ශ්රී ලංකාව බොරතෙල් බැරලයකට ඇමරිකානු ඩොලර් 286ක අධික මිලක් ගෙවන බවට සමාජ මාධ්ය සහ ඇතැම් මාධ්ය ජාල ඔස්සේ පැතිර යන පුවත සම්පූර්ණයෙන්ම සාවද්ය බව ලංකා ඛනිජ තෙල් නීතිගත සංස්ථාව (CPC) අද (16) විශේෂ නිවේදනයක් නිකුත් කරමින් අවධාරණය කරයි.
මැදපෙරදිග යුද්ධය ආරම්භ වීමෙන් පසු ලංකාවට පැමිණෙන බොරතෙල් නැව් තොග සඳහා බැරලයකට ගෙවීමට පොරොන්දු වී ඇති මිල ගණන් ඇමරිකානු ඩොලර් 71.99, 111.62, 71.81 සහ 113.29 වැනි අගයන් ගනී. මෙය දැනට පවතින ලෝක වෙළෙඳපොළ මිල ගණන්වලට සාපේක්ෂව ශ්රී ලංකාවට ඉතා වාසිදායක මට්ටමක් බව සංස්ථාව පෙන්වා දෙයි.
මැදපෙරදිග නොසන්සුන්කාරී වාතාවරණයෙන් පසු ශ්රී ලංකාවට ලැබෙන පළමු බොරතෙල් නැව හෙට (17) දිනයේදී දිවයිනට ළඟා වීමට නියමිතය. මෙම බොරතෙල් තොග සපුගස්කන්ද පිරිපහදුව සඳහා පමණක් භාවිත කිරීමට නියමිත බව ද සංස්ථාව සඳහන් කරයි.
සංස්ථාවේ කීර්තිනාමය විනාශ කිරීමේ අරමුණින් සහ මහජනතාව නොසන්සුන් කිරීමේ අරමුණින් මෙවැනි අසත්ය තොරතුරු පතුරුවන පුද්ගලයන්ට සහ පාර්ශවයන්ට එරෙහිව තරාතිරම නොබලා නීතිමය ක්රියාමාර්ග ගන්නා බව සංස්ථා සභාපතිවරයා වැඩිදුරටත් දන්වා සිටියි.
