සති හයකට වැඩි කාලයක් පුරා ඇදෙමින් පවතින ඉරාන යුද්ධය අවසන් කිරීම සඳහා වන සාකච්ඡාවල යම් ප්රගතියක් අත්පත් කරගෙන ඇති බව වාර්තා වේ. පාකිස්ථාන හමුදා ප්රධානී ෆීල්ඩ් මාර්ෂල් අසීම් මුනීර් (Asim Munir) මැදිහත්කරු ලෙස කටයුතු කරමින් ටෙහෙරාන් නුවරදී සිදුකළ සාකච්ඡා මෙලෙස සුබවාදී බලාපොරොත්තු ඇති කිරීමට සමත් වී තිබේ.
පසුගිය සති අන්තයේ ඉස්ලාමාබාද්හි පැවැති සාකච්ඡා එකඟතාවයකින් තොරව අවසන් වුවද, අසීම් මුනීර්ගේ වත්මන් ටෙහෙරාන් සංචාරය හරහා දෙපාර්ශවය අතර පැවැති දැඩි මතභේදකාරී කරුණු කිහිපයකට විසඳුම් ලැබෙමින් පවතින බව රොයිටර් පුවත් සේවය සඳහන් කරයි. විශේෂයෙන්ම ලෝකයේ තෙල් සහ ගෑස් සැපයුමෙන් පහෙන් එකක් ගමන් කරන ‘හෝමූස් සමුද්ර සන්ධිය’ (Strait of Hormuz) නැවත විවෘත කිරීම කෙරෙහි මෙහිදී වැඩි අවධානයක් යොමුව ඇත.
යුද්ධය නැවැත්වීම සඳහා බලාපොරොත්තු මතු වුවද, ඉරානයේ න්යෂ්ටික වැඩපිළිවෙළ සම්බන්ධයෙන් පවතින මූලික ගැටලුවලට මෙතෙක් විසඳුමක් ලැබී නොමැති බව ඉරාන උසස් නිලධාරියෙක් අවධාරණය කරයි. මේ හේතුවෙන් සති දෙකක කාලයක් සඳහා පනවා ඇති සටන් විරාමය දීර්ඝ කිරීම සහ දෙවන වටයේ සාකච්ඡා ආරම්භ කිරීම පිළිබඳව අවධානය යොමුව තිබේ.
මෙම යුද්ධය හේතුවෙන් හෝමූස් සමුද්ර සන්ධිය වැසී යාම නිසා ලෝක ඉතිහාසයේ දරුණුතම තෙල් මිල ඉහළ යාම වාර්තා විය. යුද්ධය අවසන් වීමේ සේයාවන් මතු වීමත් සමඟ අද දිනයේ ගෝලීය කොටස් වෙළෙඳපොළ දර්ශකයන් වාර්තාගත ලෙස ඉහළ ගොස් ඇති බව ආර්ථික විශ්ලේෂකයෝ පවසති. දීර්ඝකාලීන ගැටුමක් ලෝක ආර්ථිකය දැඩි පසුබෑමකට (Recession) ලක් කළ හැකි බවට ජාත්යන්තර මූල්ය අරමුදල මීට පෙර අනතුරු අඟවා තිබුණි.
