කියුබාවේ ජාතික විදුලිබල පද්ධතිය (SEN) පසුගිය අඟහරුවාදා (ජූලි 14) දින සම්පූර්ණයෙන්ම බිඳ වැටීම හේතුවෙන් දස ලක්ෂ දහයකට ආසන්න ජනතාවක් නැවත වරක් විදුලිය නොමැතිව අඳුරේ සිටීමට සිදුව ඇත. මෙය දින 10කට අඩු කාලයක් තුළ එරට සිදු වූ තුන්වන මහා පරිමාණ විදුලි බිඳවැටීම වන අතර, 2026 වසරේදී වාර්තා වූ පස්වන අවස්ථාව මෙයයි.
අඟහරුවාදා දේශීය වේලාවෙන් පෙරවරු 11:05ට පමණ කියුබාවේ ජාතික විදුලිබල පද්ධතිය සම්පූර්ණයෙන්ම විසන්ධි විය. කියුබාවේ විදුලි සංස්ථාව (UNE) පවසන පරිදි, එරට නැගෙනහිර පිහිටි හොල්ගුයින් පළාතේ ජනන යන්ත්රයක ඇති වූ තාක්ෂණික දෝෂයක් හේතුවෙන් පද්ධතියේ සංඛ්යාතය හදිසියේ වෙනස් වීම මෙම බිඳවැටීමට හේතු වී ඇත.
මෙම අඛණ්ඩ විදුලි බිඳවැටීම් හේතුවෙන් පොදු ප්රවාහන සේවා, ජල සැපයුම, අන්තර්ජාලය සහ දුරකථන සේවා ඇතුළු එරට මූලික යටිතල පහසුකම් දැඩි ලෙස අඩාල වී ඇත. රෝහල්වල සැත්කම් ඇතුළු අත්යවශ්ය සේවා පවත්වාගෙන යාමට බලධාරීන්ට දැඩි වෙහෙසක් දැරීමට සිදුවී ඇති අතර, ජනතාවගේ දෛනික ආහාර සැපයුම ද බරපතළ අර්බුදයකට ලක්ව තිබේ.
කියුබාව දශක ගණනාවකට පසු මුහුණ දෙන දරුණුතම ආර්ථික අර්බුදය සහ යල් පැන ගිය විදුලි බලාගාර පද්ධතිය මෙම තත්ත්වයට ප්රධාන හේතුව වී ඇත. මීට අමතරව, ඇමරිකා එක්සත් ජනපදය විසින් පනවා ඇති තෙල් සම්බාධක හේතුවෙන් බලාගාර සඳහා අවශ්ය ඉන්ධන ලබාගැනීමට නොහැකි වීම, විදුලි පද්ධතියේ ක්රියාකාරීත්වය සම්පූර්ණයෙන්ම අඩපණ කර ඇත.
මේ වන විට බලධාරීන් විසින් රෝහල් සහ ආහාර නිෂ්පාදන මධ්යස්ථාන වැනි අත්යවශ්ය ස්ථාන සඳහා ප්රමුඛත්වය ලබා දෙමින්, පද්ධතිය යථා තත්ත්වයට පත් කිරීම සඳහා ක්ෂුද්ර දූපත් ක්රමවේදය භාවිත කරමින් විදුලිය ලබා දීමට උත්සාහ කරමින් සිටින බව වාර්තා වේ.
