ජර්මානු ජෛව තාක්ෂණ සමාගමක් වන CureVac, ඇමෙරිකානු Moderna සමාගමට එරෙහිව ඩෙලවෙයාර් ෆෙඩරල් අධිකරණයේදී නඩු පවරා තිබේ. මොඩර්නා සමාගමේ ‘Spikevax’ COVID-19 එන්නත නිෂ්පාදනය කිරීමේදී CureVac සතු පණිවිඩකාරක RNA (mRNA) තාක්ෂණයට අදාළ පේටන්ට් බලපත්ර අටක් උල්ලංඝනය කර ඇති බවට මෙහිදී චෝදනා එල්ල වේ.
CureVac සමාගම පවසන්නේ එන්නත් සඳහා භාවිතා කරන අස්ථාවර mRNA තාක්ෂණය ස්ථායී කිරීම සඳහා තමන් සොයාගත් ක්රමවේද මොඩර්නා සමාගම විසින් කොපි කර ඇති බවයි. මේ හේතුවෙන් Spikevax එන්නත් අලෙවියෙන් ලැබුණු ආදායමෙන් තමන්ට හිමිවිය යුතු කර්තෘ භාගය (Royalties) වන්දි වශයෙන් ලබාදෙන ලෙස ඔවුන් අධිකරණයෙන් ඉල්ලා සිටී.
පසුගිය වසරේදී Pfizer සමාගම සමඟ එක්ව ‘Comirnaty’ එන්නත නිපදවූ BioNTech සමාගම විසින් CureVac සමාගම මිලදී ගන්නා ලදී. ඒ අනුව මෙම නීතිමය ක්රියාමාර්ගය ජෛව තාක්ෂණික ක්ෂේත්රයේ දැවැන්තයින් අතර ඇතිවූ තවත් එක් තීරණාත්මක ගැටුමකි. දැනටමත් මොඩර්නා සමාගම විසින් Pfizer සහ BioNTech සමාගම්වලට එරෙහිව පේටන්ට් බලපත්ර නඩුවක් පවත්වාගෙන යන අතර, GlaxoSmithKline, Bayer සහ Alnylam වැනි සමාගම් ද COVID-19 එන්නත් අලෙවියෙන් ලැබුණු බිලියන සංඛ්යාත ආදායමෙන් කොටසක් ඉල්ලා නඩු පවරා ඇත.
මොඩර්නා සමාගම ප්රකාශ කර ඇත්තේ තමන් මෙම නඩුව පිළිබඳව දැනුවත් බවත්, අධිකරණය හමුවේ ඊට එරෙහිව කරුණු ඉදිරිපත් කරන බවත්ය. COVID-19 වසංගතය අවසාන වුවද, එම එන්නත් නිපදවීමට යොදාගත් mRNA තාක්ෂණයේ අයිතිය සහ ඉන් ලැබුණු අතිවිශාල ලාභය බෙදාගැනීම සම්බන්ධයෙන් වන මෙම නීතිමය අරගල ඉදිරි වසර කිහිපය තුළදීත් තීරණාත්මක වනු ඇත.
