දිවයින පුරා ඩෙංගු රෝග ව්යාප්තිය සීඝ්රයෙන් ඉහළ යාම හේතුවෙන්, ජාතික ඩෙංගු මර්දන ඒකකය විසින් ජූනි 15 වන දින සිට ක්රියාත්මක වන පරිදි ‘ඩෙංගු මර්දන සතියක්’ ප්රකාශයට පත් කර තිබේ.
මෙම තීරණය ගනු ලැබුවේ පසුගිය දිනවල පැවති විශේෂ ඩෙංගු මර්දන වැඩසටහන්වලදී පාසල්, රජයේ කාර්යාල සහ වෙනත් පොදු ස්ථානවල මදුරුවන් බෝවන ස්ථාන විශාල ප්රමාණයක් හඳුනාගැනීමෙන් අනතුරුවය. ජාතික ඩෙංගු මර්දන ඒකකයේ ප්රජා වෛද්ය විශේෂඥ ප්රශිලා සමරවීර මහත්මිය පෙන්වා දෙන්නේ, ජනතාවගේ දායකත්වය නොමැතිව මෙම රෝග ව්යාප්තිය සාර්ථකව පාලනය කළ නොහැකි බවයි.
මෙම කාලසීමාවේදී නිවසේ, පාසලේ සහ කාර්යාලයේ මදුරුවන් බෝවිය හැකි ජලය රැඳෙන බඳුන්, ටයර්, ඉවතලන ප්ලාස්ටික් සහ වෙනත් ද්රව්ය ඉවත් කර පරිශ්රය පිරිසිදු කර ගැනීමට කටයුතු කරන්න. වහලයේ උන්නාංශ, වැහි පීලි සහ කාණු පද්ධති පිරිසිදුව තබා ගැනීමට වගබලා ගැනීම අත්යවශ්ය වේ. උණ රෝග ලක්ෂණ ඇත්නම් වහාම සුදුසුකම් ලත් වෛද්යවරයෙකු හමුවන්න. කිසිදු විටෙක වෛද්ය උපදෙස්වලින් තොරව නිවසේදී ඖෂධ ලබා ගැනීම හෝ වේදනා නාශක භාවිත කිරීමෙන් වළකින්න.
ඩෙංගු මර්දන සතිය තුළදී සෞඛ්ය අංශ, පොලීසිය සහ ප්රාදේශීය බලධාරීන් එක්ව තම ප්රදේශවල මදුරු මර්දන කටයුතු තීව්ර කිරීමට නියමිතය. මෙම ව්යසනයෙන් ඔබත් ඔබගේ පවුලේ අයත් ආරක්ෂා කර ගැනීමට වගකීමෙන් යුතුව කටයුතු කරන්න.
