නිරිතදිග මෝසම් සුළං සක්රීය වීමත් සමඟ ඇති වී තිබෙන අධික වර්ෂාපතනය හේතුවෙන් ඩෙංගු සහ මදුරුවන්ගෙන් බෝවන අනෙකුත් රෝග ව්යාප්ත වීම වැළැක්වීම සඳහා ජුනි 15 වැනිදා සිට 20 වැනිදා දක්වා දින 6ක් පුරා දිවයින පුරා විශේෂ ඩෙංගු මර්දන හා පරිසර පිරිසිදු කිරීමේ සතියක් ක්රියාත්මක කිරීමට රාජ්ය පරිපාලන, පළාත් සභා සහ පළාත් පාලන අමාත්යාංශය පියවර ගෙන තිබේ. පළාත් පාලන ආයතන බල ප්රදේශ තුළ ප්රජා සහභාගිත්වය ඇතිව ක්රියාත්මක වන මෙම වැඩසටහනේදී නගර, අවහිර වූ කාණු, පොදු ස්ථාන, වෙළඳසැල්, ආගමික ස්ථාන, බස් නැවතුම්පළවල් සහ ඉදිකිරීම් පරිශ්ර කෙරෙහි විශේෂ අවධානයක් යොමු කෙරේ.
මෙම විශේෂ සතිය තුළ ජනතාව දැනුවත් කිරීම, ධූමායන කටයුතු (Fogging) සිදු කිරීම, ජලය රැඳෙන ස්ථාන විනාශ කිරීම මෙන්ම වැව්, ගංගා, ඇළදොළ සහ වෙරළ තීරයන් පිරිසිදු කිරීම ද සිදු කිරීමට නියමිතය. තවද, අවිධිමත් ලෙස කසළ බැහැර කරන්නන් වැළැක්වීම සඳහා පරිසර පොලිසියේ විශේෂ සහාය ලබා ගැනීමට ද කටයුතු යොදා ඇත. මෙහි විශේෂ පියවරක් ලෙස එළඹෙන ජුනි 18 වැනිදා දිවයිනේ සියලුම පාසල් කේන්ද්ර කරගනිමින් විශේෂ ඩෙංගු මර්දන වැඩසටහනක් ක්රියාත්මක කිරීමට සැලසුම් කර ඇති බව ද අමාත්යාංශය සඳහන් කරයි.
විශේෂයෙන්ම ඉදිකිරීම් පරිශ්රවල ජලය රැඳෙන ස්ථාන පිරිසිදු කර කීට නාශක යොදන ලෙසත්, ජල ටැංකි සහ භාජන නිසි පරිදි වසා තබන ලෙසත් උපදෙස් මාලාවක් නිකුත් කර ඇත. මෙම ජාතික වැඩසටහන සාර්ථක කර ගැනීම සඳහා සියලුම රාජ්ය ආයතන, ස්වේච්ඡා සංවිධාන මෙන්ම සමස්ත මහජනතාවගේ සක්රීය දායකත්වය ලබාදෙන ලෙස බලධාරීන් ඉල්ලා සිටියි.
