පවතින ඩෙංගු රෝගී තත්ත්වයේ සීඝ්ර වැඩිවීම පිටුපස ඇති ප්රධාන සාධකයක් ලෙස පළාත් පාලන ආයතනවල අක්රමවත් අපද්රව්ය කළමනාකරණය හඳුනාගෙන ඇති බව වෛද්ය හා සිවිල් අයිතිවාසිකම් පිළිබඳ වෛද්යවරුන්ගේ වෘත්තීය සමිති සන්ධානයේ සභාපති විශේෂඥ වෛද්ය චමල් සංජීව මහතා අනතුරු අඟවයි.
බස්නාහිර පළාත ඇතුළු දිවයිනේ බොහෝ ප්රදේශවල අපද්රව්ය එකතු වීම හේතුවෙන් ඩෙංගු මදුරුවන් බෝවීමට හිතකර පරිසරයක් නිර්මාණය වී ඇති බව ඔහු පෙන්වා දෙයි. බැහැර කරන ලද අපද්රව්ය තුළ ජලය එකතු වීම නිසා මදුරු කීටයන් වර්ධනය වීමට සුදුසු ස්ථාන බහුල වී ඇත. බොහෝ පළාත් පාලන ආයතන නිසි පරිදි අපද්රව්ය එකතු කර බැහැර කිරීමට අපොහොසත් වීම නිසා නිවාස අසල, මාර්ග අයිනවල සහ පොදු ස්ථානවල කසළ ගොඩගැසී පවතී.
මෙම තත්ත්වය හමුවේ වෛද්ය සංජීව මහතා පුද්ගල වගකීම, අධි අවදානම් කණ්ඩායම් ආරක්ෂා කිරීම, ආයතනික වගකීම සහ වෛද්ය උපදෙස් පැතීම ඉතා වැදගත් බව අවධාරණය කරයි. මදුරුවන් බෝවීම වැළැක්වීම සඳහා තම නිවෙස් සහ අවට පරිසරය පිරිසිදුව තබා ගැනීම මහජනතාවගේ වගකීමකි. ගර්භනී කාන්තාවන්, කුඩා දරුවන්, වැඩිහිටියන් සහ දියවැඩියාව වැනි බෝ නොවන රෝගවලින් පෙළෙන පුද්ගලයන් ඩෙංගු ආසාදනයෙන් පසු බරපතල තත්ත්වයට පත්වීමේ වැඩි ඉඩක් පවතින බැවින් වැඩි අවධානයෙන් සිටිය යුතුය. රජයේ සහ අර්ධ රජයේ ආයතන, පාසල් සහ විශ්වවිද්යාල ප්රධානීන් තම පරිශ්රයන් මදුරුවන් බෝවන ස්ථානවලින් තොරව පවත්වා ගැනීමට නිසි වැඩසටහන් ක්රියාත්මක කළ යුතුය. ඩෙංගු රෝග ලක්ෂණ මතු වූ වහාම සුදුසුකම් ලත් වෛද්යවරයෙකුගේ අධීක්ෂණය යටතේ ප්රතිකාර ලබාගත යුතුය.
ඩෙංගු මර්දනය සඳහා තවදුරටත් ලොව පුරා භාවිතා කරන නවීන තාක්ෂණික දියුණුව හඳුන්වා දීමට සෞඛ්ය බලධාරීන් කටයුතු කළ යුතු බවත්, දශක තුනකට ආසන්න කාලයක් ගත වුවද තවමත් මෙම රෝගය කාර්යක්ෂමව පාලනය කර ගැනීමට නොහැකි වී තිබීම කනගාටුවට කරුණක් බවත් වෛද්යවරයා වැඩිදුරටත් සඳහන් කළේය.
