ඩිජිටල් තාක්ෂණය සෞඛ්ය සේවාවේ කාර්යක්ෂමතාව, ප්රවේශය සහ තීරණ ගැනීමේ හැකියාව ඉහළ නැංවීමට උපකාරී වුවද, එම තාක්ෂණය වෛද්ය-රෝගී සබඳතාව ශක්තිමත් කරන අයුරින් භාවිත කළ යුතු බව සෞඛ්ය හා ජනමාධ්ය අමාත්ය වෛද්ය නලින්ද ජයතිස්ස මහතා පවසයි.
ශ්රී ලංකාවේ පවුලේ වෛද්යවරුන්ගේ විද්යායතනය (CGPS) විසින් කොළඹදී සංවිධානය කරන ලද 51 වැනි වාර්ෂික අධ්යයන සැසියට සහභාගී වෙමින් අමාත්යවරයා මේ බව අවධාරණය කළේය. “ඩිජිටල් යුගයේ කරුණාව, අඛණ්ඩතාව සහ පෙනී සිටීම” තේමාව කරගනිමින් පැවති මෙම සමුළුවේදී, ලෝකය පුරා ජනගහන වයස්ගත වීම, බෝ නොවන රෝග වැඩි වීම සහ සෞඛ්ය වියදම් ඉහළ යාම වැනි අභියෝග හමුවේ ශක්තිමත් සෞඛ්ය පද්ධතියක් ගොඩනැඟිය හැක්කේ ප්රාථමික සෞඛ්ය සේවාව ශක්තිමත් කිරීම මත බව ඒ මහතා පෙන්වා දුන්නේය.
රෝග විනිශ්චය සහ ප්රතිකාරවලට අමතරව, රෝගීන්ට උපදෙස්, විශ්වාසය සහ අඛණ්ඩ සත්කාර ලබා දීමේ අද්විතීය කාර්යභාරයක් පවුලේ වෛද්යවරුන් ඉටු කරන බව අමාත්යවරයා සිහිපත් කළේය. වෛද්ය-රෝගී සබඳතා සම්පූර්ණයෙන්ම තාක්ෂණයෙන් හෝ කෘත්රිම බුද්ධියෙන් ප්රතිස්ථාපනය කළ නොහැකි බවත්, රෝහල් පද්ධතිය මත පමණක් සෞඛ්ය සේවාවේ බර පැටවිය නොහැකි බවත් ඒ මහතා වැඩිදුරටත් කියා සිටියේය.
මෙම අධ්යයන සැසිය සඳහා ඕස්ට්රේලියාවේ සහ නේපාලයේ ප්රමුඛ පෙළේ පවුලේ වෛද්ය විශේෂඥයන් රැසක් සහභාගී වූ අතර, පවුලේ වෛද්ය සේවාවේ ගුණාත්මකභාවය ඉහළ නැංවීම, වෘත්තීය සංවර්ධනය සහ ජාත්යන්තර වෘත්තීය සබඳතා ශක්තිමත් කිරීම සඳහා මෙම වේදිකාව විශේෂ දායකත්වයක් ලබා දෙනු ඇත.
