දිට්වා හදිසි ආපදා තත්ත්වයන්ට මුහුණ දුන් පවුල් සඳහා නිවාස ලබාදීමේ වැඩසටහන යටතේ, යුද සමයේ සෙන්චෝලේ ඛේදවාචකයට මුහුණ දුන් පුද්ගලයන් 18 දෙනෙකුට සහ අතුරුදහන් වූ පවුල් 3ක් වෙනුවෙන් නිවාස ඉදි කර ගැනීමට රුපියල් ලක්ෂ 50ක මුදලක් සහ අක්කර භාගයක ඉඩමක් ලබාදීමට රජය කටයුතු කර ඇත.
අදාළ නිවාස ඉදි කර ගැනීම සඳහා වන මුදල්වලින් මූලික අදියරේ මුදල් ප්රදානය කිරීමේ චෙක්පත් පිරිනැමීම අධිකරණ සහ ජාතික ඒකාබද්ධතා අමාත්ය, නීතිඥ හර්ෂණ නානායක්කාර මහතාගේ ප්රධානත්වයෙන් කිලිනොච්චිය පරන්තන් නගරයේ පරන්තන් ග්රාම සංවර්ධන සමිති ශාලාවේදී අද (25) පෙරවරුවේ සිදු විය.
යුද්ධයෙන් ජයග්රාහකයෙක් නොමැති බවත්, දෙපාර්ශ්වයම පරාජයට පත් වන අතර ඉතිරි වන්නේ කණගාටුදායක කටුක අත්දැකීම් පමණක් බවත් අමාත්යවරයා සඳහන් කළේය. යුද්ධයෙන් විනාශ වූ ගොඩනැගිලි ඉදි කිරීමට වඩා වැඩි කාලයක් කැඩි බිඳී ගිය සිත් සුවපත් කිරීමට ගත වන බව ඔහු පෙන්වා දුන්නේය. ජාතීන් අතර මිත්රත්වය ගොඩනැගීම වචනයට පමණක් සීමා නොවිය යුතු බවත්, උතුර සහ දකුණ යනුවෙන් කිසිදු භේදයක් නොමැති බවත් හෙතෙම අවධාරණය කළේය. මීට වසර දෙකකට පෙර උතුරේ ජනතාව රජයට මිත්රත්වයේ දෑත් දිගු කළ බවත්, අතුරුදහන් වූවන් සම්බන්ධයෙන් සහ අදාළ පවුල්වලට අවශ්ය සාධාරණත්වය ඉටු කිරීමට වත්මන් රජය කැපවී සිටින බවත් පැවසීය.
සෙන්චෝලේ සිද්ධියට මුහුණ දුන් පවුල් 18කට සහ අතුරුදහන් වූ තැනැත්තන්ගේ පවුල් 3කට නිවාස ඉදි කර ගැනීමට අක්කර භාගයක ඉඩමක් සහ රුපියල් ලක්ෂ 50ක මුදලක් ලබා දෙන අතර, එම පවුල්වලට අක්කර භාගයක ඉඩමෙහි වගා කිරීම සඳහා අවශ්ය පොල් පැල සංකේතාත්මකව බෙදාදීමද මෙහිදී සිදු විය. මෙම අවස්ථාවට යාපනය දිස්ත්රික් පාර්ලිමේන්තු මන්ත්රී කේ. ඉලන්කුමරන් සහ කිලිනොච්චිය දිස්ත්රික් ලේකම් එස්. මුරලිදරන් යන මහත්වරුන් ඇතුළු පිරිසක් සහභාගී වූහ.
