ගෝලීය හෙපටයිටිස් තුරන් කිරීමේ සංවිධානය (CGHE) විසින් ප්රකාශයට පත් කරන ලද 2026 වසරේ හෙපටයිටිස් තුරන් කිරීමේ ශූරයන් අතරට ජාතික ලිංගාශ්රිත රෝග සහ ඒඩ්ස් මර්දන වැඩසටහනේ විශේෂඥ වෛද්ය සත්යා හේරත් මහත්මිය තේරී පත්ව තිබේ. ජූලි 28 වන දිනට යෙදෙන ලෝක හෙපටයිටිස් දිනයට සමගාමීව මෙම තේරී පත්වීම ප්රකාශයට පත් කර ඇති අතර, හෙපටයිටිස් තුරන් කිරීම සඳහා කැපවීම, මහජන දැනුවත්භාවය, ප්රතිපත්ති සංවර්ධනය සහ සේවා සැපයීම වෙනුවෙන් සුවිශේෂී දායකත්වයක් ලබාදුන් ලොව පුරා පුද්ගලයන් සිව්දෙනෙකු අතරට ඇය ඇතුළත් වී ඇත.
ප්රජා මූලික සහ නව්ය සේවා ආකෘති හරහා අවදානම් ජන කොටස් වෙත සෞඛ්ය සේවා ළඟා කරවීම, හෙපටයිටිස් C රෝගීන් කල්තියා හඳුනා ගැනීම සහ ප්රතිකාර ආරම්භ කිරීම සඳහා වෛද්ය සත්යා හේරත් මහත්මිය ලබාදුන් දායකත්වය මෙම ජාත්යන්තර ඇගයීමට හේතු වී තිබේ. ශ්රී ලංකාවේ ප්රථම කටු සහ සිරින්ජ හුවමාරු වැඩසටහන මෙන්ම ප්රජා මූලික හෙපටයිටිස් C ප්රතිකාර සේවාව හඳුන්වා දීමට පුරෝගාමී වී ඇති ඇය, 2018 වසරේ සිට එක් ස්ථානයකින් සියලු සේවා ලබාදෙන ‘One Stop Shop’ ආකෘතිය සංවර්ධනය කිරීමටද නායකත්වය ලබා දී ඇත.
මෙම ජාත්යන්තර පිළිගැනීම මඟින් 2030 වන විට වෛරස් හෙපටයිටිස් තුරන් කිරීමේ ගෝලීය ඉලක්කය සපුරා ගැනීම සඳහා ශ්රී ලංකාව ගන්නා උත්සාහයන්ට දැඩි ශක්තියක් ලැබෙන බව සඳහන් වේ. ලොව පුරා වෛරස් හෙපටයිටිස් සම්පූර්ණයෙන්ම තුරන් කිරීමේ අරමුණින් ක්රියාත්මක වන ගෝලීය හෙපටයිටිස් තුරන් කිරීමේ සංවිධානය, අඩු සහ මධ්යම ආදායම් ලබන රටවල සෞඛ්ය පද්ධති සංවර්ධනය කිරීම සහ සාර්ථක අත්දැකීම් හුවමාරු කර ගැනීම සඳහා මෙպරිදි අඛණ්ඩ දායකත්වයක් සපයනු ලබයි.
