වියළි කලාපීය ප්රදේශවල කුඹුරුවලට ජලය හිඟ වීමෙන් සිදුව ඇති වගා හානි සඳහා කඩිනමින් වන්දි ගෙවන බව කෘෂිකාර්මික හා ගොවිජන රක්ෂණ මණ්ඩලය පවසයි.
මොණරාගල, පොළොන්නරුව සහ අනුරාධපුර වැනි දිස්ත්රික්කවල පවතින වියළි කාලගුණික තත්ත්වය හේතුවෙන් වී වගාවන්ට දැඩි හානි සිදුව තිබේ. අදාළ කුඹුරු ඉඩම් වෙත ගොස් හානි පරීක්ෂා කිරීමේ කටයුතු නිලධාරීන් විසින් මේ වන විට ආරම්භ කර ඇති අතර, හානි වූ කුඹුරු සඳහා කඩිනමින් වන්දි ගෙවන ලෙස කෘෂිකර්ම අමාත්යවරයාද උපදෙස් දී ඇති බව ගොවිජන රක්ෂණ මණ්ඩලයේ සභාපති පේමසිරි ජාසිංආරච්චි මහතා සඳහන් කරයි.
ජලය හිඟ වීමෙන් වී වගාවන් හානියට පත්ව ඇත්නම්, ප්රදේශයේ කෘෂිකර්ම පර්යේෂණ නිෂ්පාදන සහකාරවරුන් හෝ කෘෂිකාර්මික හා ගොවිජන රක්ෂණ මණ්ඩලයේ නිලධාරීන් හමුවී වගා හානිය දැනුම්දිය යුතුය. ප්රාදේශීය මට්ටමින් පිහිටි ගොවිජන සංවර්ධන මධ්යස්ථානවල ඇති හානි දැනුම්දීමේ පොතෙහිද මෙම වගා හානිය සටහන් කළ හැකිය. වැඩිදුර තොරතුරු ලබා ගැනීම සඳහා 1918 යන කෙටි අංකය ඇමතීමේ පහසුකම ගොවීන් සඳහා සලසා දී ඇත.
මේ අතර, පොළොන්නරුව දිස්ත්රික්කයේ මැදිරිගිරිය ප්රාදේශීය ලේකම් කොට්ඨාසයේ මීගස්වැව, නිකවැව, එළබටුවැව, කුන්කුනා වැව, කුඩා වැව සහ බටුහේන වැව ඇතුළු වැව් රැසක් වර්ෂාව නොමැති වීම හේතුවෙන් සම්පූර්ණයෙන්ම වියළී ගොස් ඇත. මෙම වැව් මඟින් වගා කෙරුණු අක්කර සියගණනක කුඹුරු බිම් සඳහා දැඩි බලපෑම් එල්ල වී ඇති අතර, පිපීමට ආසන්නව තිබූ ගොයම් විනාශ වීම නිසා ගොවීන් දැඩි අපහසුතාවකට පත්ව සිටිති. ඇතැම් ප්රදේශවල ගොවීන් වැව් මැද ලිං හාරා ජලය ලබා ගැනීමට උත්සාහ කරන ආකාරයද දැකගත හැකිය.
