පුද්ගලයන් ලියාපදිංචි කිරීමේ දෙපාර්තමේන්තුවේ නිල දුරකථන අංක සහ නාමය අවභාවිත කරමින් පෞද්ගලික තොරතුරු ලබාගැනීමේ සහ මූල්ය වංචා සිදුකිරීමේ ජාවාරමක් පිළිබඳව එම දෙපාර්තමේන්තුව විසින් විශේෂ නිවේදනයක් නිකුත් කරමින් ජනතාව දැනුවත් කර තිබේ.
දෙපාර්තමේන්තුවේ නිල අංකයට සමාන +94 11 52 26 126 සහ +011 52 26 126 යන අංක මෙන්ම 077 11 67 739, 074 27 56 098 යන ජංගම දුරකථන අංක භාවිත කරමින් මොවුන් ජනතාව අමතනු ලබයි. එමෙන්ම https://drpgov-lk.com නමැති ව්යාජ වෙබ් අඩවියක් ඔස්සේ තොරතුරු ලබාගැනීමට ද මොවුන් උත්සාහ කරයි.
රජයේ ලාංඡනය සහිත ජංගම දුරකථන යෙදවුමක් (App) නිර්මාණය කරමින්, ඩිජිටල් හැඳුනුම්පතක් හෝ “ඊ – ජාතික හැඳුනුම්පතක්” සඳහා ලියාපදිංචි වන ලෙස පවසමින් මොවුන් තොරතුරු ඉල්ලා සිටින බව අනාවරණය වී ඇත.
පුද්ගලයන් ලියාපදිංචි කිරීමේ දෙපාර්තමේන්තුව අවධාරණය කරන්නේ තමන් විසින් මෙතෙක් ඩිජිටල් හෝ ඊ – ජාතික හැඳුනුම්පතක් සඳහා එවැනි ලියාපදිංචි කිරීමක් සිදු නොකරන බවයි. එබැවින් මෙලෙස ලැබෙන ඇමතුම් හෝ පණිවිඩවලට තම පෞද්ගලික තොරතුරු හෝ මුදල් ලබාදීමෙන් වළකින ලෙස ජනතාවගෙන් කාරුණිකව ඉල්ලා සිටියි.
