පවතින ආර්ථික පීඩනය සහ ඖෂධ සැපයුම් යාන්ත්රණයේ ඇතිවී තිබෙන බාධා හේතුවෙන් ශ්රී ලංකාව තුළ අත්යවශ්ය ඖෂධ වර්ග කිහිපයක හිඟයක් මතුව ඇති බව වෛද්ය වෘත්තීය සමිති අනතුරු අඟවයි.
වෛද්ය හා සිවිල් අයිතිවාසිකම් පිළිබඳ වෛද්යවරුන්ගේ වෘත්තීය සමිති සන්ධානයේ සභාපති විශේෂඥ වෛද්ය චමල් සංජීව මහතා පෙන්වා දෙන්නේ, රුපියලේ අගය පහළ යාම සහ උද්ධමනය ඉහළ යාම හේතුවෙන් විදේශීය ඖෂධ සැපයුම්කරුවන් නිසි ලෙස ඖෂධ සැපයීම අඩාල කර ඇති බවයි. මෙම තත්ත්වය පිළිකා, වකුගඩු සහ අක්මා රෝගවලින් පෙළෙන රෝගීන්ට මෙන්ම ශල්යකර්ම සඳහා බලා සිටින රෝගීන්ට ද දැඩි ලෙස බලපා ඇත.
ඖෂධ ලියාපදිංචි කිරීමේ ප්රමාදයන්, රජය විසින් පාලනය කරනු ලබන මිල ගණන් යටතේ ඖෂධ ආනයනය කිරීමට සැපයුම්කරුවන් අකමැති වීම සහ ඇමරිකානු ඩොලරයට සාපේක්ෂව රුපියල වේගයෙන් අවප්රමාණය වීම මෙම අර්බුදයට ප්රධාන හේතු වී ඇත. සමහර රෝගීන්ට ඉහළ මිලක් ගෙවා විදේශයන්ගෙන් ඖෂධ ගෙන්වා ගැනීමට සිදුව ඇති අතර, එමගින් අඩු ආදායම්ලාභී රෝගීන් දැඩි ආර්ථික පීඩනයකට ලක්ව ඇත.
වගකිවයුතු බලධාරීන් කඩිනමින් මැදිහත් වී මෙම ගැටලුවට විසඳුම් ලබා නොදුනහොත්, ඉදිරියේදී සෞඛ්ය සේවාවන් සහ රෝගී සත්කාරක කටයුතු තවදුරටත් බරපතළ ලෙස අඩාල විය හැකි බව විශේෂඥ වෛද්ය චමල් සංජීව මහතා අවධාරණය කරයි.
