පවතින අයහපත් කාලගුණික තත්ත්වය හේතුවෙන් ඔහිය – කලුපහන – උඩවේරිය මාර්ගයට විශාල පස්කන්දක් කඩා වැටීමෙන් එම මාර්ගයේ රථවාහන ගමනාගමනයට බාධා එල්ල වී තිබේ. හල්දුම්මුල්ල පොලිසිය පවසන පරිදි, මෙම පස්කන්ද කඩා වැටී ඇත්තේ වෙස්ට් හපුතලේ පාසලට ආසන්න ප්රදේශයෙනි.
දෙස් විදෙස් සංචාරකයින් බහුලව භාවිත කරන මෙම මාර්ගය ඔස්සේ ඔහිය, උඩවේරිය, වීරකෝන්ගම සහ ඉදල්ගස්හින්න වැනි ප්රදේශ රැසකට පිවිසිය හැකිය. පස්කන්ද හේතුවෙන් මාර්ගය අවහිර වී ඇති බැවින් ප්රදේශවාසීන්ට සහ සංචාරකයින්ට දැඩි අපහසුතාවන්ට මුහුණ දීමට සිදුව ඇත.
මාර්ගයට කඩා වැටී ඇති පස් සහ ගල් කැබලි ඉවත් කිරීම සඳහා බැකෝ යන්ත්රයක් යොදා ගනිමින් කඩිනම් පියවර ගනිමින් සිටින බව මාර්ග සංවර්ධන අධිකාරිය සඳහන් කරයි. වාහන රියදුරන් මෙම මාර්ගය භාවිත කිරීමේදී දැඩි අවධානයෙන් පසුවන ලෙස බලධාරීන් ඉල්ලා සිටී.
