සංචාරක වීසා බලපත්ර උපයෝගී කර ගනිමින් ඩුබායි සහ මෝල්ඩෝවා රටවල රැකියා ලබාදෙන බව පවසා මුදල් වංචා කිරීමේ චෝදනා මත රක්ෂිත බන්ධනාගාර ගත කර සිටි රන්තැටිගේ නිශ්ශංක ප්රියදර්ශන නොහොත් “ඩුබායි සුද්දා” නමැත්තා තමන්ට එරෙහි චෝදනාවලට අධිකරණය හමුවේ වරද පිළිගෙන තිබේ. විදේශ රැකියා ලබාදීම සඳහා වලංගු බලපත්රයක් නොමැතිව කුලියාපිටිය ප්රදේශයේ පුද්ගලයකුගෙන් රුපියල් ලක්ෂ 7ක මුදලක් වංචා කිරීම සම්බන්ධයෙන් පසුගිය ජූනි 16 වනදා නඩුව කැඳවූ අවස්ථාවේදී ඔහු මෙලෙස වරද පිළිගත් අතර, අගතියට පත් පාර්ශවයට එම රුපියල් ලක්ෂ 7ක මුදල ගෙවීම සඳහා අධිකරණයේ තැන්පත් කරන ලෙස කුලියාපිටිය මහේස්ත්රාත්වරයා නියෝග කළේය. ලබන අගෝස්තු 25 වනදා මෙම නඩුව නැවත කැඳවීමට නියමිත අතර, මොහුට එරෙහිව පවතින තවත් මෙවැනිම වංචා නඩුවක් ජූනි 26 වනදා වැලිසර අධිකරණයේදී ද කැඳවීමට නියමිතව ඇත. මේ අතර, මෙම සැකකරු විසින් සිදුකරන ලද වෙනත් විදේශ රැකියා වංචාවන් ඇත්නම් ඒ පිළිබඳව වහාම තමන් වෙත පැමිණිලි කරන ලෙස විදේශ සේවා නියුක්ති කාර්යාංශය මහජනතාවගෙන් ඉල්ලා සිටියි.
