යාපනය, චෙම්මනි සමූහ මිනීවළේ කැණීම් කටයුතු සාර්ථකව සිදුවන බවත්, එම ක්රියාවලිය අවසන් කිරීම සඳහා අවශ්ය ප්රතිපාදන වෙන්කර ඇති බවත් අධිකරණ සහ ජාතික ඒකාබද්ධතා අමාත්ය හර්ෂණ නානායක්කාර මහතා ප්රකාශ කළේය. අමාත්යවරයා මේ බව සඳහන් කළේ අද (19) අරියාලෙයි සිත්තුපති චෙම්මනි සමූහ මිනීවළ භූමියේ සිදුවන කැණීම් කටයුතු නිරීක්ෂණය කිරීම සඳහා පැමිණි අවස්ථාවේදීය. විපතට පත්වූවන්ට යුක්තිය ඉටුකිරීම තහවුරු කිරීම සඳහා මෙම කැණීම් කටයුතු හැකි ඉක්මනින් අවසන් කළ යුතු බව අවධාරණය කළ අමාත්යවරයා, එහිදී මාධ්ය අමතමින් අතුරුදන්වූවන් පිළිබඳ විමර්ශන සම්බන්ධයෙන් ද කරුණු පැහැදිලි කළේය. ජ්යෙෂ්ඨ මහාචාර්ය රාජ් සෝමදේව මහතාගේ ප්රධානත්වයෙන් පුරාවිද්යා සිසුන්, අධිකරණ වෛද්යවරුන් සහ ක්ෂේත්රයේ විශේෂඥයින්ගේ සහභාගීත්වයෙන් මෙම කැණීම් සිදුවන අතර, මෙම අවස්ථාවට අතුරුදන්වූවන් පිළිබඳ කාර්යාලයේ (OMP) සභාපති මහේෂ් කටුලන්ද, කොළඹ හිටපු ප්රධාන අධිකරණ වෛද්ය නිලධාරී වෛද්ය අජිත් තෙන්නකෝන්, යාපනය දිස්ත්රික් පාර්ලිමේන්තු මන්ත්රීවරුන් වන කේ. ඉලන්කුමාරන් සහ රාජීවන් ජෙයචන්ද්රමූර්ති යන මහත්වරුන් ඇතුළු නිලධාරීන් පිරිසක් එක්ව සිටියහ.
