පාස්කු ඉරුදින ත්රස්ත ප්රහාරය සම්බන්ධයෙන් රාජ්ය බුද්ධි සේවයේ හිටපු අධ්යක්ෂ සුරේෂ් සලේ මහතා විසින් ගොනු කර තිබූ රිට් පෙත්සම අභියාචනාධිකරණය හමුවේ අද (17) යළි කැඳවනු ලැබීය. එහිදී පෙත්සම්කරු වෙනුවෙන් පෙනී සිටි ජනාධිපති නීතිඥ සංජීව ජයවර්ධන මහතා පාස්කු ප්රහාරය වැළැක්වීමට තිබූ අවස්ථා මගහැරීම සම්බන්ධයෙන් බරපතළ කරුණු ගණනාවක් අධිකරණය හමුවේ හෙළි කළේය.
සහරාන් හෂීම් ඇතුළු අන්තවාදීන් 129 දෙනෙකුගේ නම් ඇතුළත් ලැයිස්තුවක් 2019 ජනවාරි 31 වනදා රාජ්ය බුද්ධි සේවය විසින් අපරාධ පරීක්ෂණ දෙපාර්තමේන්තුව වෙත ලබා දී තිබුණ ද, එම පුද්ගලයින් අත්අඩංගුවට ගැනීමට අපරාධ පරීක්ෂණ දෙපාර්තමේන්තුව නිසි පියවර ගෙන නොතිබූ බව නීතිඥවරයා අවධාරණය කළේය. මීට අමතරව, 2018 වසරේදී පාකිස්තානු බුද්ධි අංශය විසින් මෙරට තුළ ක්රියාත්මක වන ඉස්ලාමීය අන්තවාදී කණ්ඩායම් පිළිබඳව අනතුරු අඟවා තිබූ බවත්, එවන් තොරතුරු ලැබී තිබියදීත් සහරාන් හෂීම් ඇතුළු පිරිස අත්අඩංගුවට ගැනීමට කටයුතු නොකළේ මන්දැයි ඔහු ප්රශ්න කළේය.
එවක රාජ්ය බුද්ධි සේවයේ අධ්යක්ෂ නිලන්ත ජයවර්ධන මහතා විසින් අන්තවාදී ක්රියාකාරකම් පිළිබඳ වාර්තා 97ක් පොලිස්පතිවරයා වෙත සහ අපරාධ පරීක්ෂණ දෙපාර්තමේන්තුව වෙත යොමු කර තිබූ බවත්, මාවනැල්ල බුදුපිළිම විනාශ කිරීම සහ වනාතවිල්ලුව පුපුරණ ද්රව්ය සිද්ධිය වැනි සිදුවීම් හරහා ඔවුන්ගේ සම්බන්ධය අනාවරණ වී තිබූ බවත් නීතිඥවරයා පෙන්වා දුන්නේය. ඉන්දීය රෝ බුද්ධි අංශය මගින් 2019 අප්රේල් 04 වනදා ලබා දුන් ප්රහාරය පිළිබඳ අනතුරු ඇඟවීම, අපරාධ පරීක්ෂණ දෙපාර්තමේන්තුවේ එවක ජ්යෙෂ්ඨ නියෝජ්ය පොලිස්පති රවී සෙනෙවිරත්න මහතාගේ කාර්යාලය වෙත ලැබී තිබුණ ද, එය නියෝජ්ය පොලිස්පතිවරයා සහ අධ්යක්ෂවරයා අතර හුවමාරු වී අවසානයේ අධ්යක්ෂවරයා වෙත යොමු කර තිබුණේ ප්රහාරය සිදුවීමෙන් පසු දින බව ඔහු චෝදනා කළේය.
තම සේවාදායකයා සම්බන්ධයෙන් වර්තමානයේ විමර්ශන සිදු කරන නිලධාරීන් එකල මෙම වගකීම් පැහැර හැර ඇති බව පෙන්වා දුන් නීතිඥවරයා, එවැනි පසුබිමක ඔවුන්ගේ අපක්ෂපාතීත්වය පිළිබඳව දැඩි ප්රශ්න මතු කළේය. ඉදිරිපත් වූ කරුණු සලකා බැලූ අධිකරණය පෙත්සම වැඩිදුර විභාගය සඳහා ලබන 21 වනදා දක්වා කල් තැබීය.
