නැගෙනහිර පළාතේ සිදුවන නීති විරෝධී ඉඩම් අත්පත් කර ගැනීම්, අනවසර වෙරළබඩ සංවර්ධන කටයුතු සහ ඉඩම් ආශ්රිත ගැටලුවලට කඩිනමින් විසඳුම් සෙවීම සඳහා “නැගෙනහිර පළාත් ඉඩම් සුරැකීම” නමින් විශේෂ කමිටුවක් පත් කිරීමට අමාත්ය මණ්ඩල අනුමැතිය හිමිව තිබේ. දකුණු පළාත් හිටපු ඉඩම් කොමසාරිස් සේනක පල්ලියගුරුගේ මහතාගේ සභාපතිත්වයෙන් යුත් මෙම කමිටුව මඟින් නැගෙනහිර පළාතේ දේශපාලන හා පරිපාලන බලතල අවභාවිත කරමින් සිදුකර ඇති අනවසර ඉදිකිරීම් පිළිබඳව සොයා බැලීමට නියමිතය. මෙම නීති විරෝධී ක්රියාකාරකම් හේතුවෙන් කලාපයේ ස්වභාවික පරිසර පද්ධතියට හානි සිදුවී ඇති අතර, වෙරළ ඛාදනය වේගවත් වීම සහ ජාතික ආරක්ෂාවට ද බලපෑම් එල්ල වී ඇති බව කැබිනට් තීරණවල සඳන් වේ.
මීට අමතරව, දේශපාලන බලපෑම් මත සිදුකෙරෙන අනවසර ඉඩම් අත්පත් කර ගැනීම් සහ ගොඩකිරීම් වැළැක්වීම සඳහා නියෝජ්ය පොලිස්පතිවරයෙකු (DIG) යටතේ ක්රියාත්මක වන විශේෂ පොලිස් ඒකකයක් පිහිටුවීමට ද කැබිනට් අනුමැතිය ලැබී ඇත. මේ යටතේ නීති විරෝධී කටයුතු මැඩපැවැත්වීම සඳහා ආරක්ෂක අංශ වෙත පූර්ණ බලතල පැවරෙනු ඇත. එමෙන්ම ශ්රී ලංකා මහවැලි අධිකාරිය මඟින් මීට වසර පහකට පෙර ව්යාපෘති සඳහා ලබාදී, මෙතෙක් කිසිදු සංවර්ධනයක් සිදුකර නොමැති රජයේ ඉඩම් නැවත පවරාගෙන, ඒවා පොදු සංවර්ධන කටයුතු සඳහා ප්රාදේශීය ලේකම්වරුන් වෙත පැවරීමට ද රජය තීරණය කර තිබේ.
නැගෙනහිර වෙරළ තීරයේ පරිසර පද්ධතිය ආරක්ෂා කරමින් විධිමත් සංචාරක සංවර්ධන සැලැස්මක් සකස් කිරීමට ද මෙහිදී යෝජනා වී ඇත. විශේෂයෙන්ම නැගෙනහිර වෙරළ තීරයේ පවත්වාගෙන යනු ලබන හෝටල් සම්බන්ධයෙන් රජයේ නිලධාරීන් විසින් පක්ෂපාතීත්වයෙන් තොරව සහ විනිවිදභාවයකින් යුතුව නීතිය ක්රියාත්මක කිරීම සහතික කිරීම සඳහා නව යාන්ත්රණයක් හඳුන්වා දීමට ද අමාත්ය මණ්ඩලය පියවර ගෙන තිබේ.
