Suez Canal ආදායමටත් දැඩි බලපෑමක්!
ඊජිප්තු ජනාධිපති අබ්දෙල් ෆත්තාහ් එල්-සිසි, රතු මුහුදේ ආරක්ෂිත හා බාධාවකින් තොර නාවික ගමනාගමනයක් සහතික කිරීම සඳහා සෞදි අරාබිය ඉදිරිපත් කරන ඉල්ලීමට සහාය පළ කර තිබෙනවා.
කයිරෝ නුවරදී සෞදි ඔටුන්න හිමි කුමරු මොහොමඩ් බින් සල්මාන් සමඟ පැවති සාකච්ඡාවකදී එල්-සිසි මේ බව ප්‍රකාශ කළ බව ඊජිප්තු ජනාධිපති කාර්යාලය සඳහන් කර තිබෙනවා.
එම සාකච්ඡාවේදී රතු මුහුද සහ බාබ් අල්-මන්දබ් සමුද්‍ර සන්ධිය හරහා ආරක්ෂිත නාවික ගමනාගමනය පවත්වාගෙන යාමේ වැදගත්කම පිළිබඳවද අවධානය යොමු වී තිබෙනවා.
එමෙන්ම, යේමනයේ පවතින ගැටුම සඳහා තිරසාර දේශපාලන විසඳුමක් ලබාගැනීමේ අවශ්‍යතාව පිළිබඳවද දෙපාර්ශ්වය අවධානය යොමු කර ඇති බව සඳහන්.
මේ අතර, යේමනයේ හූති සටන්කාමීන් මෝචා වරාය අත්පත් කරගෙන ඇති බවත්, බාබ් අල්-මන්දබ් සමුද්‍ර සන්ධියට සැලකිය යුතු බලපෑමක් ඇති කරමින් සිටින බවත් Al Jazeera වාර්තා කරයි.
හූති සංවිධානය විසින් රතු මුහුදේ නාවික ගමනාගමනයට බලපෑමක් නොකරන බවට ප්‍රකාශ කර තිබුණද, පසුගිය මාස කිහිපය තුළ සෞදියට සම්බන්ධ නෞකා ඉලක්ක කර ප්‍රහාර එල්ල වී ඇති බව සඳහන්.
රතු මුහුද හරහා නෞකා ගමනාගමනය අඩුවීම ඊජිප්තුවටද දැඩි ආර්ථික බලපෑමක් එල්ල කර තිබෙනවා. විශේෂයෙන්ම විදේශ විනිමය සඳහා වැදගත් ආදායම් මාර්ගයක් වන Suez Canal ආදායම සැලකිය යුතු ලෙස පහළ ගොස් තිබෙනවා.
Suez Canal Authority දත්ත අනුව, 2023 සහ 2024 අතර කාලයේදී ඊජිප්තුවට ඇමරිකානු ඩොලර් බිලියන 7ක පමණ ආදායමක් අහිමි වී ඇති අතර, එය එම කාලයේ ඇළ මාර්ගයෙන් ලැබූ ආදායමෙන් 60%කට ආසන්න බව සඳහන්.
