කොළඹ නගරයේ පිහිටි පිටකොටුව පාවෙන වෙළඳ සංකීර්ණය (Floating Market) සහ බේරේ වැව ආශ්රිත කලාපය විධිමත් ලෙස සංවර්ධනය කිරීමට රජය පියවර ගෙන තිබේ. නාගරික සංවර්ධන නියෝජ්ය අමාත්ය එරංග ගුණසේකර මහතා ඊයේ (15) එම පරිශ්රයේ සිදුකළ විශේෂ ක්ෂේත්ර පරීක්ෂණයකින් අනතුරුව කියා සිටියේ, අද වන විට මෙම ව්යාපෘතිය අසාර්ථක වී පරිසරයට හා මහජනතාවට දැඩි අනාරක්ෂිත ස්ථානයක් බවට පත්ව ඇති බවයි. 2014 වසරේදී වෙළඳසැල් 92කින් ආරම්භ වූ මෙම සංකීර්ණයේ දැනට ක්රියාත්මක වන්නේ වෙළඳසැල් 16ක් වැනි සුළු ප්රමාණයක් පමණක් බවත්, නඩත්තු නොකිරීම නිසා ගොඩනැගිලි දිරාපත්ව විනාශ වෙමින් පවතින බවත් එහිදී අනාවරණය විය.
බැස්ටියන් මාවත සහ ඩී. ආර්. විජේවර්ධන මාවත යා කරන පාලම හා අත්වැටවල් දිරාපත්වීම නිසා මගී ජනතාව දැඩි අනතුරකට මුහුණ පා සිටින අතර, විදුලි පද්ධති අක්රිය වීම හේතුවෙන් මෙම පරිශ්රය විවිධ අපචාර සිදුවන ස්ථානයක් බවට පත්ව ඇත. මේ තත්ත්වය වහාම නිවැරදි කිරීමට උපදෙස් දුන් නියෝජ්ය අමාත්යවරයා, ජනතාව දැනුවත් කිරීමේ පුවරු භාෂා තුනෙන්ම ප්රදර්ශනය කරන ලෙසත්, ශ්රී ලංකා ඉඩම් සංවර්ධනය කිරීමේ සංස්ථාව හරහා බේරේ වැව මතුපිට පවිත්ර කිරීමේ කටයුතු දෛනිකව සිදුකරන ලෙසත් නිලධාරීන්ට අවධාරණය කළේය.
හෙක්ටයාර් 65ක් පුරා විහිදී ඇති බේරේ වැවේ පාරිසරික හා සෞඛ්ය ගැටලුවලට විසඳුම් සෙවීම සඳහා නැගෙනහිර, බටහිර සහ ගංගාරාම බේරේ යන කලාප තුනම නිරීක්ෂණය කළ අමාත්යවරයා, දිරාපත් වී ඇති රැහැන් පාලම සහ ‘කලාදූවේ බුබ්බුලාකාර සෙවණ’ පරිශ්රය ද කඩිනමින් ප්රතිසංස්කරණය කිරීමට අවශ්ය පියවර ගන්නා බව පැවසීය. මෙම නිරීක්ෂණ චාරිකාව සඳහා නාගරික සංවර්ධන අධිකාරියේ සභාපති එම්. ජී. හේමචන්ද්ර මහතා ඇතුළු නිලධාරීන් පිරිසක් එක්ව සිටියහ.
