2026 වසර සඳහා නියමිත සියලුම විභාග, මීට පෙර ප්රකාශයට පත් කළ කාලසටහනට අනුව කිසිදු වෙනස් කිරීමකින් තොරව අදාළ දිනවලදීම පැවැත්වීමට සියලු කටයුතු සූදානම් කර ඇති බව විභාග කොමසාරිස් ජනරාල් ඉන්දිකා කුමාරි ලියනගේ මහත්මිය පවසයි. අද (24) පස්වරුවේ රජයේ ප්රවෘත්ති දෙපාර්තමේන්තුවේ පැවති මාධ්ය හමුවකට එක්වෙමින් ඇය මේ බව අවධාරණය කළාය.
ඒ අනුව, 2025 සැප්තැම්බර් 14 වැනි දින නිකුත් කරන ලද නිවේදනයට අනුව සකස් කළ කාලසටහනම ඉදිරියේදී බලාත්මක වන බව විභාග කොමසාරිස් ජනරාල්වරිය වැඩිදුරටත් සඳහන් කළාය. විභාග කාලසටහන සකස් කිරීමේදී සිසුන්ට තම අධ්යයන කටයුතු සිදු කර ගැනීම සඳහා අවශ්ය කාලය පිළිබඳව ද මැනවින් කරුණු සලකා බැලූ බව ඇය පෙන්වා දුන්නාය.
මෙම තීරණයත් සමඟ සිසුන් සහ දෙමාපියන් තුළ පැවති අවිනිශ්චිතතාව දුරු වෙමින්, ඉදිරි විභාග කටයුතු සැලසුම් සහගතව ක්රියාත්මක කිරීමට හැකි වනු ඇත. විභාග කොමසාරිස් ජනරාල්වරියගේ මෙම ප්රකාශයත් සමඟම විභාග පැවැත්වීම සම්බන්ධයෙන් පවතින ගැටළු නිරාකරණය වී ඇති අතර, නියමිත දින වකවානු ඔස්සේ විභාග පද්ධතිය සාර්ථකව මෙහෙයවීමට දෙපාර්තමේන්තුව සූදානමින් සිටියි.
