ලෝක කුසලාන තරගාවලියේ සහ අනෙකුත් ප්රධාන තරගවල කොටස් පෞද්ගලික ආයෝජකයන්ට අලෙවි කිරීමට ගෙන පසුව අතහැර දමන ලද මතභේදාත්මක සැලැස්මක් සම්බන්ධයෙන්, ෆීෆා (FIFA) සභාපති ජියානි ඉන්ෆන්ටිනෝට (Gianni Infantino) එරෙහිව අපරාධ නඩු පැවරීමට යුරෝපා පාපන්දු සංගමය (UEFA) සූදානම් වන බව බීබීසී (BBC) වාර්තා කරයි.
ස්විට්සර්ලන්තයේදී ඉන්ෆන්ටිනෝට එරෙහිව අපරාධ නඩු කටයුතු ආරම්භ කිරීම සඳහා අවශ්ය සාක්ෂි සහ ලියකියවිලි ලබාගැනීමට යුරෝපා පාපන්දු සංගමය විසින් අධිකරණමය අයැදුම්පතක් ඉදිරිපත් කර ඇති බව බීබීසී ස්පෝර්ට්ස් වෙත ලැබී ඇති ලියකියවිලි මගින් අනාවරණය වේ. ඉන්ෆන්ටිනෝ විසින් “අපරාධමය අවමංපාලනයක” (criminal mismanagement) නිරත වී ඇති බවට යුරෝපා පාපන්දු සංගමය දැඩි චෝදනා නගයි.
මෑතකදී අවසන් වූ ලෝක කුසලානයෙන් පසු, ‘Fifa Forward Enterprise’ (FFE) නමින් නව සමාගමක් පිහිටුවා ෆීෆා තරගාවලිවල කොටස් පෞද්ගලික ආයෝජකයන්ට විකිණීමට ඉන්ෆන්ටිනෝ යෝජනා කර තිබුණද, දැඩි විරෝධතා හමුවේ එම සැලැස්ම අත්හැර දමන ලදී. මෙම සැලැස්ම හරහා ඉන්ෆන්ටිනෝ සහ ඔහුගේ සමීප කවය ස්වයං-පෝෂණය වීමට සහ ෆීෆා ආයතනයේ වටිනාම වත්කම්වලින් අයුතු ලෙස ලාභ ලැබීමට උත්සාහ කර ඇති බව යුරෝපා පාපන්දු සංගමය පවසයි. ඩොලර් බිලියන 4.2ක මුදලකට මෙම කොටස් අලෙවි කිරීමට යෝජනා කර තිබූ අතර, එහි සමස්ත ව්යවසාය වටිනාකම ඩොලර් බිලියන 20ක් වැනි ඉතා අඩු අගයක් ලෙස කිසිදු ස්වාධීන තක්සේරුවකින් තොරව හිතුවක්කාර ලෙස තීරණය කර ඇති බව ඔවුන් චෝදනා කරයි.
ස්විට්සර්ලන්තයේදී අපරාධ චෝදනා ඉදිරිපත් කිරීම සඳහා, ෆීෆා ආයතනයට අයත් ෆ්ලොරිඩාහි පිහිටි ‘Fifa Americas’ සහ ‘FWC2026’ යන ව්යාපාරික ආයතන සතු ගොනු වෙත ප්රවේශ වීමට යුරෝපා පාපන්දු සංගමය ෆ්ලොරිඩා අධිකරණයකින් අයැදුම් කර තිබේ. මෙම රහසිගත සැලැස්ම මගින් ෆීෆා ආයතනයේ කීර්තිනාමයට සහ යුරෝපා පාපන්දු සංගමයේ සාමාජික රටවල් 55ක් ඇතුළු සමස්ත පාපන්දු පවුලට දැඩි හානියක් සිදුව ඇති බව පෙන්වා දෙන යුරෝපා පාපන්දු සංගමය, ඉන්ෆන්ටිනෝට අමතරව තවත් ෆීෆා නිලධාරීන්ට එරෙහිවද අපරාධ නඩු පැවරීමට සූදානම් වන බව වැඩිදුරටත් අවධාරණය කරයි.
