ධීවර ක්ෂේත්රයේ ප්රගතිය උදෙසා සීනෝර් (Ceynor) සහ නෝර්ත් සී (North Sea) යන රාජ්ය ආයතන ද්විත්වය එකිනෙක ඒකාබද්ධ කර, නවීන තාක්ෂණය යටතේ ප්රතිසංවිධානය කිරීමට රජය සැලසුම් කර ඇතැයි ධීවර, ජලජ හා සාගර සම්පත් අමාත්ය රාමලිංගම් චන්ද්රසේකර් මහතා පැවසීය. අමාත්යවරයා මේ බව කියා සිටියේ නෝර්වේ තානාපති කාර්යාලයේ උසස් නිලධාරීන් පිරිසක් සමඟ ධීවර අමාත්යාංශයේදී පසුගියදා (18) පැවැති ද්විපාර්ශ්වික සාකච්ඡාවකදීය.
මෙම ආයතනික ප්රතිසංවිධානය හරහා යාපනය, ලුණුවිල සහ වීරවිල යන ප්රදේශවල දැනට ක්රියාත්මක වන ධීවර දැල් නිෂ්පාදන මධ්යස්ථාන උසස් ප්රමිතියෙන් සහ නවීන පහසුකම්වලින් යුත් ආයතන බවට පත්කිරීම රජයේ අපේක්ෂාව බව අමාත්යවරයා පෙන්වා දුන්නේය. ධීවර ක්ෂේත්රයේ පවතින අධික ඉන්ධන පිරිවැය අවම කිරීම අරමුණු කරගනිමින්, බැටරි බලශක්තිය සහ ‘Hydrogen Cells’ වැනි හරිත බලශක්ති තාක්ෂණයන් (Green Energy Technology) මෙරට ධීවර කර්මාන්තයට හඳුන්වාදීම කෙරෙහි ද මෙහිදී විශේෂ අවධානයක් යොමු විය.
එමෙන්ම, ශ්රී ලංකාව තුළ දැනට පවතින යුරෝපා සංගමයේ (EU) අනුමැතිය ලත් මත්ස්ය පිරිසැකසුම් මධ්යස්ථාන 44ක් උපයෝගී කරගනිමින්, නෝර්වේ සමාගම් සමඟ ඒකාබද්ධ ව්යාපාර (Joint Ventures) ආරම්භ කිරීමේ ඇති හැකියාව පිළිබඳව ද ඇමැතිවරයා කරුණු පැහැදිලි කළේය. මීට අමතරව, ජාතික ජලජ සම්පත් පර්යේෂණ හා සංවර්ධන නියෝජිතායතනය (NARA) සමඟ ක්රියාත්මක පර්යේෂණ ව්යාපෘති තවදුරටත් දීර්ඝ කිරීමටත්, නෝර්වේ රාජ්යයේ සාර්ථක ‘ආපදා සූදානම් වීමේ සැලසුම්’ (Preparedness Plan) මෙරට ධීවර ක්ෂේත්රයට හඳුන්වාදීමටත් දෙපාර්ශ්වය අතර එකඟතාව පළ විය.
මෙරට ධීවර ක්ෂේත්රයේ පවතින පුළුල් ආයෝජන අවස්ථා අධ්යයනය කිරීම සඳහා නෝර්වේ රාජ්යයේ ව්යාපාරික නියෝජිත කණ්ඩායමකට ශ්රී ලංකාවේ සංචාරයක නිරත වන ලෙස ද අමාත්ය රාමලිංගම් චන්ද්රසේකර් මහතා මෙහිදී නිල වශයෙන් ආරාධනා කර සිටියේය.
මෙම අවස්ථාවට ශ්රී ලංකා රජය වෙනුවෙන් ධීවර අමාත්යාංශයේ ලේකම් ආචාර්ය බී.කේ. කෝලිත කමල් ජිනදාස මහතා ද, නෝර්වේ තානාපති කාර්යාලයේ දෙවැනි ලේකම් ටෝමෝඩ් නූලන්ඩ් (Mr. Tormod Nuland) සහ ශ්රී ලංකාවේ නෝර්වේ ගෞරවනීය කොන්සල් ජනරාල් මනෝ සේකරම් (Mr. Mano Sekaram) යන මහත්වරු ද සහභාගි වූහ.
