2006 අංක 6 දරන මූල්ය ගනුදෙනු වාර්තා කිරීමේ පනතේ 19(1) සහ 19(2) වගන්ති යටතේ, ශ්රී ලංකා මූල්ය බුද්ධි ඒකකය විසින් 2025 ඔක්තෝබර් මස සිට 2026 මාර්තු මස දක්වා වූ කාලපරිච්ඡේදය තුළ වාර්තාකරණ ආයතනවල අනුකූලතාව බලාත්මක කිරීම සඳහා සමස්ත රුපියල් ලක්ෂ එකසිය හතළිස් හයක (රු. 14,600,000.00) දණ්ඩන මුදලක් අය කර ඒකාබද්ධ අරමුදලට බැර කර ඇත. මෙම කාලසීමාව තුළ සණස ලයිෆ් ඉන්ෂුවරන්ස් කොම්පැනි පීඑල්සී (Sanasa Life Insurance Company PLC) ආයතනය වෙතද 2026.01.05 දිනැතිව රුපියල් 2,000,000.00 ක (රුපියල් මිලියන දෙකක) පරිපාලනමය දණ්ඩනයක් පනවා තිබේ.
මෙම දණ්ඩනය පැනවීමට ප්රධාන වශයෙන් කරුණු කිහිපයක් බලපා තිබේ. ඉන් පළමුවැන්න වන්නේ, පැන්ත පරීක්ෂණයේදී නියැදි පරීක්ෂාවකින් හමුවූ රුපියල් මිලියනයක් හෝ එයට සමාන විදේශ මුදලකින් වූ මුදල් ප්රමාණයක් ඉක්මවන ගනුදෙනු නවයක් (9) නියමිත කාලපරිච්ඡේදය ඇතුළත වාර්තා කිරීමට අපොහොසත් වීමයි. දෙවනුව, එක්සත් ජාතීන්ගේ ආරක්ෂක මණ්ඩල යෝජනා (UNSCR 1373, 1267 සහ 1718) යටතේ නම් කරන ලද තැනැත්තන් සහ ආයතනවල සම්පූර්ණ ලැයිස්තුවක් පවත්වාගෙන යාමට මෙන්ම, මූල්ය බුද්ධි ඒකකය විසින් දැනුම් දුන් වහාම පරීක්ෂණ පද්ධති යාවත්කාලීන කිරීමටද සමාගම අපොහොසත් වී ඇත.
තවද, සමූහ රක්ෂණ ඔප්පු ලබා දීමේදී අදාළ ලැයිස්තුවලට එරෙහිව ගනුදෙනුකරුවන් සත්යාපනය නොකිරීම සහ දේශපාලනික වශයෙන් අනාවරණය වූ පුද්ගලයන් (PEP) සමඟ ව්යාපාරික සම්බන්ධතා ඇති කර ගැනීමට පෙර අවශ්ය ජ්යෙෂ්ඨ කළමනාකාරීත්වයේ අනුමැතිය ලබා නොගැනීමද මෙම දණ්ඩනයට හේතු වී තිබේ.
කෙසේ වෙතත්, පද්ධති හා කාර්ය පටිපාටිවල ඉහත දුර්වලතා නිරීක්ෂණය වුවද, එක්සත් ජාතීන්ගේ යෝජනාවන් යටතේ නම් කරන ලද පාර්ශ්වයන් සමඟ සමාගම විසින් ව්යාපාරික සම්බන්ධතා පැවැත්වූ අවස්ථා කිසිවක් පැන්ත පරීක්ෂණයේදී අනාවරණය වී නොමැති බව මූල්ය බුද්ධි ඒකකය වැඩිදුරටත් සඳහන් කරයි. මෙම අනුකූල නොවීම්, අවදානම් මත පදනම් වූ පැන්ත පරීක්ෂණයකදී හඳුනාගෙන ඇත.
