කටාර් රාජ්යයේ හිටපු එමීර්වරයෙකු වන ෂෙයික් හමාඩ් බින් කලීෆා අල් තානි මහතා අභාවප්රාප්ත වී තිබේ. ඒ මහතාගේ අභාවය නිමිත්තෙන් සිව්දින ජාතික ශෝක කාලයක් ප්රකාශයට පත් කිරීමට කටාර් රාජ්යයේ උත්තරීතර රාජ්ය ආයතනය වන ‘අමිරි දිවාන්’ පියවර ගෙන ඇත. මියයන විට එතුමා 74 වන වියෙහි පසුවිය.
1995 සිට 2013 දක්වා කටාර් රාජ්යයේ එමීර්වරයා ලෙස කටයුතු කළ ෂෙයික් හමාඩ් බින් කලීෆා අල් තානි මහතා, නූතන කටාර් රාජ්යයේ නිර්මාතෘවරයා ලෙස සැලකේ. සිය පාලන සමය තුළ රටේ ස්වාභාවික වායු කර්මාන්තය දියුණු කරමින් කටාර් රාජ්යය ලෝකයේ ධනවත්ම රාජ්යයක් බවට පත් කිරීමට මෙන්ම, ජාත්යන්තර මට්ටමේ ප්රකට ‘අල් ජසීරා’ මාධ්ය ජාලය ආරම්භ කිරීමට ද ඒ මහතා සුවිශේෂී දායකත්වයක් ලබා දුන්නේය.
කලාපීය දේශපාලන සම්ප්රදායන්ගෙන් බැහැර වෙමින්, 2013 වසරේදී ස්වේච්ඡාවෙන්ම සිය පුත් සහ වත්මන් එමීර්වරයා වන ෂෙයික් තමීම් බින් හමාඩ් අල් තානි මහතා වෙත බලය පවරා දීමට ඒ මහතා කටයුතු කළේය. අභාවප්රාප්ත වූ හිටපු එමීර්වරයා වෙනුවෙන් ලෝක නායකයින් රැසක් සිය ශෝකය පළ කර ඇති අතර, කටාර් රාජ්යයේ ආර්ථික හා රාජ්ය තාන්ත්රික ගමන්මඟ හැඩගැස්වූ නායකයෙකු ලෙස ඒ මහතා ජාත්යන්තර ගෞරවයට පාත්ර වී ඇත.
