වෙඩි වැදීමෙන් අභාවප්රාප්ත වූ හිටපු පොලිස්පති සී.ඩී. වික්රමරත්න මහතාගේ දේහය පිළිබඳ අවසන් කටයුතු පොලිස් ගෞරව සහිතව බොරැල්ල කනත්තේදී පැවැත්වුණු අතර, එහිදී අනුශාසනාවක් කරමින් හුණුපිටිය ගංගාරාමාධිපති ආචාර්ය පූජ්ය කිරින්දේ අස්සජී හිමියෝ සඳහන් කළේ ඒ මහතා නිල ඇඳුමෙන් මෙන්ම සාමාන්ය දායකයෙකු ලෙසද ශාසනයට සහ සමාජයට අගනා මෙහෙවරක් ඉටු කළ බවයි.
අවමංගල්ය සභාව අමතමින් උඩුවේ ධම්මාලෝක හිමියන්ද සඳහන් කර සිටියේ හිටපු පොලිස්පතිවරයා පදවි තාන්න මාන්න කෙරෙහි තෘෂ්ණාවෙන් කටයුතු නොකළ, සියලු ආගම් හා ජාතීන්ට ගරු කළ ආදර්ශමත් චරිතයක් බවයි. උන්වහන්සේලා ඇතුළු මහා සංඝරත්නයේ ප්රධානත්වයෙන් මතක වස්ත්ර පූජාව ඇතුළු ආගමික වතාවත් සිදු කරමින් අභාවප්රාප්ත හිටපු පොලිස්පතිවරයාට පින් අනුමෝදන් කිරීම සිදු කෙරිණි.
