ශුක්රාණු දායකයෙකුගෙන් පිළිසිඳ ගත් ආතර් කර්මල්වසීන්, වසර ගණනාවක් පුරා පැරීසියේ තමන් යන සෑම තැනකදීම තම පියා විය හැකි යැයි සිතෙන පුද්ගලයන් දෙස සැකයෙන් බැලුවේය. වැඩිහිටියෙකු ලෙස, ඔහු පැරීසියේ තවත් පරිත්යාගශීලියෙකුගෙන් පිළිසිඳ ගත් ඕඩ්රි සමඟ ආදරයෙන් බැඳුණු විට එම ගැටළුව තවත් තීව්ර විය.
පළමු බැල්මෙන්ම ඇති වූ ආදරයක් ලෙස ඔවුන් තම හමුවීම හැඳින්වුවද, මෙම බැඳීම සැබෑ ආදර සම්බන්ධතාවක්ද නැතහොත් ජානමය ආකර්ෂණයක්ද යන ගැටළුව ඔවුන්ට මතු විය. ඔවුන් උපන් කාලය වන විට පැරීසියේ ශුක්රාණු බැංකු දෙකක් පමණක් තිබීම නිසා, ඔවුන් අර්ධ සහෝදර සහෝදරියන් වීමට සැබැවින්ම ඉඩකඩ තිබිණි. එකට ජීවිතයක් ගොඩනගා ගැනීමට පෙර ඔවුන්ට අවශ්ය වූයේ ඥාති සම්බන්ධයක් තිබේදැයි දැන ගැනීමටය.
නමුත් ප්රංශය තුළ ජාන පරීක්ෂාව සහ දායකයින්ගේ නිර්නාමිකභාවය පාලනය කරන දැඩි නීති හේතුවෙන් ඊට පිළිතුරු සෙවීම අතිශයින් දුෂ්කර විය. ප්රංශයේ නීතියට අනුව නිවසේදී DNA පරීක්ෂණයක් සිදු කිරීම අපරාධයකි. ජාන පරීක්ෂණ ඇණවුම් කර අධීක්ෂණය කළ හැක්කේ වෛද්යවරුන්ට හෝ විනිසුරුවන්ට පමණක් වන අතර, එවැනි පරීක්ෂණ කට්ටල ළඟ තබා ගැනීම හේතුවෙන් යුරෝ 3,500 කට වැඩි දඩයකට යටත් වීමට සිදු විය හැක. එබැවින් 23andMe වැනි සමාගම් ප්රංශයේ තම කට්ටල අලෙවි නොකරයි. 1994 සිට ක්රියාත්මක මෙම නීතිය මඟින් වාණිජ සමාගම් වෙත සංවේදී ජාන දත්ත යෑම වැළැක්වීම සහ පවුල් ආරවුල් වළක්වන බව එහි ආධාරකරුවෝ පවසති. එහෙත්, මෙგැනි පරීක්ෂණ භාවිතය අපරාධයක් ලෙස සලකන යුරෝපයේ එකම රට ප්රංශය බව ආතර් පෙන්වා දෙයි.
