තාරුණ්යයේ කලා කුසලතා ඔප් නැංවීමේ අරමුණින් ජාතික යොවුන් සේනාංකය විසින් සංවිධානය කරන ලද “Youth Arts Festival 2026” කලා උළෙල ගම්පහ දිස්ත්රික් ලේකම් කාර්යාලීය ‘ආග්රා’ නව ශ්රවණාගාරයේදී උත්කර්ෂවත් අයුරින් පැවැත්විණි.
වර්තමාන සමාජයට අවශ්ය ශක්තිමත් මෙන්ම අන් අය කෙරෙහි සහකම්පනයෙන් යුත් තරුණ පරපුරක් බිහි කිරීමේ අරමුණින් මෙම උළෙල සංවිධානය කර තිබිණි. යොවුන් කැඩෙට්වරුන්ගේ කලා හැකියාවන් මැනවින් හඳුනාගෙන ඔවුන්ට පුළුල් වේදිකාවක් සකසා දීමත්, කලාව තුළින් ජාතික එකමුතුව, නායකත්ව ලක්ෂණ සහ කණ්ඩායම් හැඟීම වර්ධනය කිරීමත් මෙහි ප්රධාන අරමුණ විය.
ජාතික යොවුන් සේනාංකයේ පළමු සහ දෙවන කණ්ඩායම් නියෝජනය කරමින් පුහුණුව ලබන යොවුන් ශිෂ්යභටයින් වෙනුවෙන් පැවති මෙම තරගාවලියේ ජාතික මට්ටමේ තරග පසුගිය අගෝස්තු 18 වන දින යක්කල පුහුණු මධ්යස්ථානයේදී පවත්වන ලදී. සම්ප්රදායික හා නිර්මාණාත්මක නර්තනය, ජංගම දුරකථන ඡායාරූපකරණය, පුවත්පත් ලිපි රචනය, වීදි නාට්ය, නිර්මාණාත්මක ඒකල හා මිශ්ර වාදන, කෙටි චිත්රපට සහ ටික්ටොක් (TikTok) නිර්මාණ ඇතුළු අංශ රැසකින් තරගකරුවෝ තම දක්ෂතා විදහා දැක්වූහ.
මෙම උළෙලේදී තරගාවලියේ සමස්ත ශූරතාවය දකුණු පළාත විසින් දිනාගත් අතර, සමස්ත අනුශූරතාවය උතුරු මැද පළාතට හිමි විය. ජාතික තලයේ දක්ෂතා දැක්වූ තරුණ තරුණියන් සවිබල ගැන්වීම වෙනුවෙන් වෘත්තීය පුහුණු ශිෂ්යත්ව සහ ඩිප්ලෝමා ශිෂ්යත්ව පිරිනැමීමද මෙහිදී සිදු කෙරිණි.
තරුණ කටයුතු සහ ක්රීඩා අමාත්ය සුනිල් කුමාර ගමගේ මහතාගේ ප්රධානත්වයෙන් පැවති මෙම අවස්ථාවට නියෝජ්ය අමාත්ය දිනිඳු සමන් හෙන්නායක, පාර්ලිමේන්තු මන්ත්රී ලසිත් භාෂණ ඇතුළු අමාත්යාංශ නිලධාරීන්, රාජ්ය ආයතන ප්රධානීන් සහ ප්රවීණ කලාකරුවන් රැසක් සහභාගී වූහ. අඩ සියවසකටත් වඩා වැඩි කාලයක් දේශීය කලාව පෝෂණය කළ ප්රවීණ රංගවේදී විජේරත්න වරකාගොඩ මහතාට විශේෂ ප්රණාම පිදීමක්ද මෙහිදී සිදු කෙරුණු අතර, ප්රවීණ රංගධර රොඩ්නි වර්ණකුලසූරිය මහතා විසින් ප්රාසාංගික අංගයක් ඉදිරිපත් කරන ලදී.
