මහා භාණ්ඩාගාරයෙන් ඇමෙරිකානු ඩොලර් ලක්ෂ 25ක් අතුරුදන් වීමේ සිද්ධිය සම්බන්ධයෙන් පාර්ලිමේන්තු මුදල් කාරක සභාව ඉදිරිපත් කළ වාර්තාව මඟින් සැබෑ වගකිවයුත්තන් ආරක්ෂා කිරීමට උත්සාහ දරා ඇති බවට ‘ෆ්රී ලෝයර්ස්’ (Free Lawyers) සංවිධානය බරපතළ චෝදනාවක් එල්ල කරයි. අදාළ වාර්තාව මඟින් වංචාවේ වගකීම පහළ මට්ටමේ නිලධාරීන් සහ “ආත්මයක් නොමැති පරිගණක යන්ත්ර” මත පටවා මහ බැංකුවේ සහ භාණ්ඩාගාරයේ ඉහළ නිලධාරීන්ට නිදහසට කරුණු සකස් කර ගැනීමට මාසයක කාලයක් ලබා දී ඇති බව එම සංවිධානය පෙන්වා දෙයි.
මුදල් කාරක සභාව සිය ව්යවස්ථාපිත වගකීම පැහැර හරිමින් හුදු කරුණු වාර්තා කිරීමක් පමණක් සිදු කර ඇති බවත්, ලංකා ඉතිහාසයේ ප්රථම වරට සිදු වූ මෙම මංකොල්ලය වළක්වා ගැනීමට නොහැකි වූයේ ඇයිද යන්න පිළිබඳව කිසිදු සාධනීය නිරීක්ෂණයක් ඉදිරිපත් කර නොමැති බවත් එම සංවිධානය අවධාරණය කරයි. විශේෂයෙන්ම මීට පෙර විදේශ ණය ගෙවීම් සම්බන්ධයෙන් වෘත්තීය පළපුරුද්දක් තිබූ මහ බැංකුවේ විදේශ ණය දෙපාර්තමේන්තුවට මෙවැනි වරදක් සිදු වූයේ කෙසේද යන්නත්, මහ බැංකුවේ පාලන අධිකාරිය මේ පිළිබඳව දිගින් දිගටම මුනිවත රකින්නේ ඇයිද යන්නත් වාර්තාවෙන් හෙළි කර නොමැති බව ඔවුහු පවසති.
මීට අමතරව භාණ්ඩාගාරය තුළ සම්බන්ධීකරණයක් නොමැති වීම, පරිගණක පද්ධති තුනක් එකිනෙකාගෙන් ස්වායත්තව පවත්වාගෙන යාම සහ මහා පරිමාණ මුදල් වගකීමක් තනි නිලධාරියෙකු වෙත පැවරීම වැනි පරිපාලනමය දුර්වලතා රැසක් මෙම සිද්ධිය හරහා නිරාවරණය වී තිබේ. රජයේ වුවමනාව මත සැබෑ අපරාධකරුවන් සැඟවීමට පාර්ලිමේන්තු මුදල් කමිටුව සිය නිල මුද්රාව ලබා දී ඇති බව පවසන ෆ්රී ලෝයර්ස් සංවිධානය, මෙය මහජන මුදල් පිළිබඳ වගකීම ලැජ්ජා සහගත ලෙස පැහැර හැරීමක් බව ද සිය නිවේදනය මඟින් වැඩිදුරටත් සඳහන් කරයි.
