ලොව විශාලතම ක්රිප්ටෝ මුදල් හුවමාරු මධ්යස්ථානයක් වූ FTX ආයතනය 2022 වසරේදී බිඳ වැටී බංකොලොත් වීමට පෙර, එම ආයතනයේ ප්රධාන නීති උපදේශක ලෙස කටයුතු කළ ඇමෙරිකාවේ ප්රමුඛ පෙළේ නීති සමාගමක් වන “Fenwick & West” ආයතනය FTX ගනුදෙනුකරුවන් වෙත ඩොලර් මිලියන 54 ක (රුපියල් කෝටි 1,600 කට අධික) දැවැන්ත වන්දි මුදලක් ගෙවා නඩු කටයුතු සමථයකට පත් කර ගැනීමට එකඟතාව පළ කර තිබේ. ඇමෙරිකානු ඉතිහාසයේ සිදුවූ විශාලතම මූල්ය වංචාවකට අනුබල දීම සහ වංචනික ක්රියාවන් සඳහා නීතිමය උපක්රම සකස් කර දීම සම්බන්ධයෙන් FTX ගනුදෙනුකරුවන් විසින් මෙම නීති සමාගමට එරෙහිව පවරා තිබූ නඩුවකට අදාළව මෙම තීරණය ගෙන ඇත. ෆ්ලොරිඩාහි මියාමි ෆෙඩරල් අධිකරණය වෙත ඉදිරිපත් කර ඇති මෙම මූලික එකඟතාව සඳහා ඉදිරියේදී විනිසුරුවරයෙකුගේ නිල අනුමැතිය හිමිවීමට නියමිතය.
තාක්ෂණික ක්ෂේත්රයේ සේවාදායකයින් වෙනුවෙන් පෙනී සිටින සිලිකන් වැලි පදනම් කරගත් Fenwick සමාගම, FTX ආයතනය ලොව ප්රමුඛතම ක්රිප්ටෝ වේදිකාවක් ලෙස නැගී එන සමයේ එහි ප්රධාන බාහිර නීති උපදේශකයා ලෙස කටයුතු කළේය. පැමිණිලිකරුවන් අධිකරණය හමුවේ චෝදනා කර සිටියේ FTX ආයතනයේ වංචනික ක්රියාවන් වසන් කිරීමට සහ ඒ සඳහා අවශ්ය උපායමාර්ග සකස් කිරීමට Fenwick සමාගම ඍජුවම දායක වී ඇති බවයි. කෙසේ වෙතත් නිවේදනයක් නිකුත් කරමින් Fenwick සමාගම ප්රකාශ කර සිටින්නේ FTX ආයතනය තුළ සිදුවූ මූල්ය වංචාවන් පිළිබඳව තමන් කිසිවක් නොදැන සිටි බවත්, තමන් සිදුකළ නීතිමය සේවාවන්හි කිසිදු වරදක් හෝ වංචාවක් සිදුව නොමැති බවත්ය. දීර්ඝ හා සංකීර්ණ නඩු විභාගයකට යෑමෙන් සිදුවන ව්යාපාරික හානිය වළක්වා ගැනීම සඳහා මෙම සමථයකට එළඹි බව ඔවුහු වැඩිදුරටත් පවසති. මෙම මහා පරිමාණ මූල්ය වංචාවේ මහමොළකරු වූ FTX නිර්මාතෘ සෑම් බෑන්ක්මන්-ෆ්රීඩ් (Sam Bankman-Fried) පාරිභෝගිකයින්ගේ ඩොලර් බිලියන 8 ක මුදලක් සොරකම් කිරීමේ චෝදනාවට වගකිකරු වෙමින් 2024 වසරේදී වසර 25 ක බරපතල වැඩසහිත සිරදඬුවමකට ලක්විය.
