ශ්රී ලංකා – කියුබානු පාර්ලිමේන්තු මිත්රත්ව සංගමයේ සභාපති, තරුණ කටයුතු හා ක්රීඩා අමාත්ය සුනිල් කුමාර ගමගේ මහතා ඇතුළු එම සංගමයේ සාමාජිකයන් සහ ශ්රී ලංකාවේ කියුබානු ජනරජයේ තානාපතිනි පැට්රීෂියා ලාසාරා පෙගෝ ගුවේරා (Patricia Lázara Pego Guerra) මහත්මිය අතර විශේෂ නිල සාකච්ඡාවක් පසුගියදා (20) පාර්ලිමේන්තු සංකීර්ණයේදී පැවැත්වුණා. දෙරට අතර පවතින දිගුකාලීන රාජ්ය තාන්ත්රික සබඳතා තවදුරටත් ශක්තිමත් කරගැනීම සහ මිත්රත්ව සංගමයේ ඉදිරි ක්රියාකාරකම් පිළිබඳව මෙහිදී දීර්ඝ ලෙස අවධානය යොමු විය.
මෙහිදී අදහස් දැක්වූ අමාත්ය සුනිල් කුමාර ගමගේ මහතා, ශ්රී ලංකාව සහ කියුබාව අතර පවතින්නේ ඓතිහාසික සමීප සබඳතාවක් බව සිහිපත් කළ අතර, පාර්ලිමේන්තු රාජ්ය තාන්ත්රිකභාවය (Parliamentary Diplomacy) වැඩි දියුණු කිරීම සහ දෙරටේ ව්යවස්ථාදායකයන් අතර ප්රජාතන්ත්රවාදී සහයෝගීතාව වර්ධනය කිරීමේ වැදගත්කම පෙන්වා දුන්නේය. සාකච්ඡාවට එක්වූ තානාපතිනි පැට්රීෂියා ලාසාරා මහත්මිය කියා සිටියේ සෞඛ්ය සේවා, ක්රීඩා, කෘෂිකර්මාන්තය සහ දේශගුණික විපර්යාස වැනි ප්රධාන ක්ෂේත්ර රැසක ද්විපාර්ශ්වික සහයෝගීතාව ශක්තිමත් කිරීමට කියුබාව සූදානම් බවයි. එමෙන්ම, සබඳතා තවදුරටත් වර්ධනය කිරීම සඳහා දෙරටේ පාර්ලිමේන්තු මිත්රත්ව සංගම්වල සාමාජිකයින් අතර මාර්ගගත (Online) සාකච්ඡාවක් සංවිධානය කිරීමට කටයුතු කරමින් සිටින බව ද ඇය සඳහන් කළාය.
කියුබාවේ වත්මන් තත්ත්වය සහ එරට මුහුණ දෙන අභියෝග පිළිබඳව ද මෙහිදී ලාංකීය නියෝජිත පිරිස දැනුවත් කෙරුණු අතර, ජාත්යන්තර මට්ටමින් ශ්රී ලංකාවෙන් කියුබාවට ලබාදිය හැකි සහයෝගය පිළිබඳව ද සාකච්ඡා විය. මීට අමතරව, ඉදිරියේදී යෙදෙන කියුබානු විප්ලවීය නායක ෆිදෙල් කැස්ත්රෝ (Fidel Castro) මහතාගේ ජන්ම දින ශතසංවත්සර අනුස්මරණ උත්සව සඳහා සහභාගී වන ලෙස ද තානාපතිනිය මෙහිදී පාර්ලිමේන්තු මන්ත්රීවරුන් වෙත ගෞරවයෙන් ආරාධනා කර සිටියාය.
