ගාල්ල, උඩුගම, කෝරළේගම ප්රදේශයේ පෞද්ගලික හෝටලයකදී සිදුවූ අමානුෂික පහරදීමකින් බරපතළ තුවාල ලැබූ පුද්ගලයන් දෙදෙනෙකු තවමත් රෝහල්ගතව ප්රතිකාර ලබමින් සිටියදී, සිද්ධියේ සැකකරුවන්ට ඇප ලැබීම සම්බන්ධයෙන් වින්දිතයන්ගේ ඥාතීන් පොලිසියට දැඩි චෝදනා එල්ල කරයි. ඉකුත් 8 වැනිදා රාත්රියේ මෙම ප්රහාරය එල්ල කර දින කිහිපයක් සැඟවී සිටි සැකකරුවන් තිදෙනා පසුව පොලිසියට භාරවීමෙන් අනතුරුව අධිකරණයට ඉදිරිපත් කර මෙලෙස ඇප මත මුදාහැර තිබේ.
ඥාතීන් පෙන්වා දෙන්නේ පහරකෑමට ලක්වූවන් උඩුගම මූලික රෝහලේ නේවාසිකව ප්රතිකාර ලබන බවට පොලිසිය විසින් අධිකරණයට නිසි ලෙස කරුණු වාර්තා නොකිරීම හේතුවෙන් සැකකරුවන්ට මෙලෙස පහසුවෙන් ඇප ලබා ගැනීමට අවස්ථාව උදාවූ බවයි. පොලිසියේ මෙම ක්රියාකලාපය පිළිබඳව ඔවුහු සිය දැඩි අප්රසාදය පළ කරති.
මෙම ප්රහාරයේ ප්රධාන සැකකරු ලෙස හඳුනාගෙන ඇති නුවන් මුත්තෙට්ටුවත්ත නැමැත්තා නෙළුව ජාතික පාසලේ සහ තවලම මහා විද්යාලයේ අනධ්යයන කාර්යමණ්ඩලයේ සේවය කරන අයෙකි. ඔහු හිනිදුම ආසනයේ සමගි ජන බලවේගයේ ප්රධාන සංවිධායක, හිටපු අමාත්ය පියසේන ගමගේ මහතාගේ දේශපාලන හිතවතෙකු වන අතර ඔහුගේ බිරිඳ ග්රාම නිලධාරිනියක ලෙස සේවය කරන බව ද වාර්තා වේ. සිද්ධියට සම්බන්ධ අනෙක් සැකකරුවන් වන්නේ කැටගොඩ පන්විල අමිත් සහ කැටගොඩ පන්විල ප්රවීන් නැමැත්තන්ය. ගාල්ල දිසාව භාර නියෝජ්ය පොලිස්පති පුෂ්ප කුමාර මහතාගේ අධීක්ෂණය යටතේ උඩුගම සහ නාගොඩ පොලිස් ස්ථාන මේ පිළිබඳව වැඩිදුර විමර්ශන සිදුකරයි.
