වර්තමාන සමාජයීය අභියෝග සහ විවිධ උපක්රමශීලී අපරාධකරුවන්ගේ ගොදුරක් නොවී, මහා සංඝරත්නය නීතිමය වශයෙන් සන්නද්ධව හා අවදියෙන් කටයුතු කිරීමේ වැදගත්කම පැහැදිලි කරමින් සංවිධානය කරන ලද “සුරක්ෂිත සසුනට නීතිමය පවුරක්” භික්ෂු වැඩමුළුව පසුගිය 17 වැනිදා පස්වරුවේ ගම්පහ ප්රාදේශීය ලේකම් කාර්යාලයීය ශ්රවණාගාරයේදී සාර්ථකව පැවැත්විණි. ගම්පහ ප්රාදේශීය ශාසනාරක්ෂක මණ්ඩලය, ගම්පහ විහාරාධිපති සංගමය සහ ගම්පහ ප්රාදේශීය ලේකම් කාර්යාලය එක්ව සංවිධානය කරන ලද මෙම විශේෂ වැඩසටහන සඳහා ගම්පහ ජ්යෙෂ්ඨ පොලිස් අධිකාරී කාර්යාලයේ නිලධාරීන් විසින් සම්පත් දායකත්වය සපයන ලදී.
මෙහිදී විශේෂ අනුශාසනාවක් සිදුකළ ගම්පහ ශාසනාරක්ෂක මණ්ඩලයේ සභාපති හා සියණෑ කෝරළයේ අධිකරණ සංඝනායක ශාස්ත්රපති පූජ්ය තෝරපිටියේ ආනන්ද නාහිමියන් අවධාරණය කළේ, වර්තමානයේදී විහාරස්ථාන කරා පැමිණෙන ඇතැම් පිරිස් ව්යාජ සහයෝගීතාවයක්, ආදරයක් හෝ සෙනෙහසක් පෙන්වමින් භික්ෂූන් වහන්සේලාව, විශේෂයෙන්ම තරුණ භික්ෂූන් වහන්සේලාව විවිධ අයථා කටයුතු සඳහා ග්රහණයට ගැනීමට උත්සාහ කරන බවයි. නීතිමය ප්රතිපාදන පිළිබඳ පවතින නොදැනුවත්කම හේතුවෙන් පසුගිය කාල වකවානුව තුළ උසස් අධ්යාපනයේ නිරත භික්ෂූන් වහන්සේලා කිහිප නමකTranslate කරදරයන්ට මුහුණ පෑ බව සිහිපත් කළ නාහිමියන්, සසුනේ අනාගතය භාර ගැනීමට සිටින පොඩි හාමුදුරුවරුන් ඇතුළු සමස්ත සංඝරත්නයම මේ පිළිබඳව දැඩි අවදියෙන් මෙන්ම බියෙන් හා සැකයෙන් යුතුව නීතිමය උපදේශකත්වය ලබමින් කටයුතු කළ යුතු බව පෙන්වා දුන්හ.
