ලෝක වෙළෙඳපොළේ බොරතෙල් මිල බැරලයක් ඩොලර් 100 සීමාව ඉක්මවා යෑමත් සමඟ ඇති වූ උද්ධමනකාරී බිය හේතුවෙන් අද (23) රන් මිල පහත වැටීමක් වාර්තා කර තිබේ. ඉහළ යන තෙල් මිල හේතුවෙන් නිෂ්පාදන සහ ප්රවාහන පිරිවැය ඉහළ යන අතර, එය පාලනය කිරීම සඳහා ලෝකයේ ප්රධාන බැංකු පොලී අනුපාත තවදුරටත් ඉහළ මට්ටමක පවතිනු ඇතැයි ආයෝජකයෝ බිය පළ කරති. රත්රන් උද්ධමනයට එරෙහි ආරක්ෂිත ආයෝජනයක් ලෙස සැලකුවද, ඉහළ පොලී අනුපාත පවතින විට පොලී ලැබෙන අනෙකුත් ආයෝජන (ප්රතිලාභ සහිත වත්කම්) වඩාත් ආකර්ෂණීය වන බැවින් රන් මිල කෙරෙහි පීඩනයක් එල්ල වේ.
පෙරවරු 02:15 වන විට ලෝක වෙළෙඳපොළේ රන් මිල සියයට 0.7 කින් පහත වැටී අවුන්සයක් ඩොලර් 4,705.09 ක් ලෙස සටහන් විය. ඇමෙරිකානු රන් අනාගත මිල ගණන් (Gold Futures) ද සියයට 0.6 කින් පහත වැටී ඩොලර් 4,722.10 ක් ලෙස වාර්තා විය.
මැදපෙරදිග කලාපයේ පවතින නොසන්සුන්කාරී තත්ත්වය සහ ඉරානය විසින් හෝමූස් සමුද්ර සන්ධියේදී නෞකා දෙකක් තම භාරයට ගැනීම තෙල් මිල ඉහළ යෑමට සෘජුවම බලපා ඇත. ඇමෙරිකානු නාවික හමුදාව තවදුරටත් ඉරාන වරායන් වටලා සිටින අතර සාම සාකච්ඡා සම්බන්ධයෙන් මෙතෙක් ප්රගතියක් වාර්තා නොවීම හේතුවෙන් ලෝක ආර්ථිකය තුළ පවතින අවිනිශ්චිතතාව තවදුරටත් තීව්ර වී තිබේ.
