ගූගල් ක්ලවුඩ් (Google Cloud) සමාගම විසින් මෙතෙක් සිය අභ්යන්තර කටයුතු සඳහා පමණක් භාවිතා කළ TPU (Tensor Processing Unit) AI චිප් බාහිර පාරිභෝගිකයන් වෙත අලෙවි කිරීමට පියවර ගෙන ඇති බව වාර්තා වේ. මේ හරහා සිය වලාකුළු සේවා (Cloud revenue) ආදායම් මාර්ග විවිධාංගීකරණය කිරීමට සමාගම අපේක්ෂා කරයි.
AI පර්යේෂණාගාර, ප්රාග්ධන වෙළඳපොළ සමාගම් සහ ඉහළ කාර්යසාධනයක් සහිත පරිගණක (high-performance computing) පරිශීලකයන් අතර මෙම TPU චිප් සඳහා පවතින ඉල්ලුම ඉහළ ගොස් ඇති බව Alphabet ප්රධාන විධායක නිලධාරී සුන්දර් පිචායි ප්රකාශ කළේය. ඒ අනුව ඇතැම් පාරිභෝගිකයන්ගේ පුද්ගලික දත්ත මධ්යස්ථාන (data centres) සඳහා මෙම චිප් සැපයීමට ගූගල් සමාගම කටයුතු කරනු ඇත.
මෙම චිප් අලෙවියෙන් ලැබෙන ආදායමෙන් කොටසක් මෙම වසරේදී වාර්තා වුවද, එහි සම්පූර්ණ මූල්ය ප්රතිලාභ 2027 වසරේ ගිණුම් වාර්තාවලින් පිළිබිඹු වනු ඇති බව මූල්ය ප්රධානී ඇනාට් අෂ්කෙනසි පවසා තිබේ. බාහිර පාර්ශව වෙත චිප් අලෙවි කිරීම හරහා මීළඟ පරම්පරාවේ අර්ධ සන්නායක (semiconductor) පර්යේෂණ සඳහා අවශ්ය අරමුදල් සපයා ගැනීමටත්, මහා පරිමාණ නිෂ්පාදන වාසි (economies of scale) අත්කර ගැනීමටත් අපේක්ෂා කරන බව සුන්දර් පිචායි වැඩිදුරටත් සඳහන් කළේය.
ගූගල් ක්ලවුඩ් හි පළමු කාර්තුව අවසානයේ ආදායම ඩොලර් බිලියන 20ක් දක්වා ඉහළ ගොස් ඇති අතර, එය පෙර වසරට සාපේක්ෂව සියයට 63ක කැපී පෙනෙන වර්ධනයකි. මේ අතර ඇමසන් වෙබ් සර්විසස් (AWS) සමාගම ද සිය අභ්යන්තර චිප් බාහිරව අලෙවි කිරීමට ඇති හැකියාව පිළිබඳව ඉඟි පළ කර ඇත.
