ප්රධාන පෙළේ කෘතිම බුද්ධි චැට්බොට් (Chatbots) අතරින් මිනිසෙකු විසින් ලියන ලද ලිපියකට වඩාත්ම සමාන ලිඛිත ප්රතිඵල ලබාදීමට Google Gemini සමත් වී ඇති බව අලුත්ම පරීක්ෂණයකින් හෙළි වී තිබේ. Open Resource Application (ORA) ආයතනය විසින් සිදු කරන ලද මෙම පරීක්ෂණයේදී බහුලව භාවිත වන AI මාදිලි 12ක් විවිධ නිර්ණායක යටතේ සංසන්දනය කර ඇත.
දීර්ඝ ලිපියක් ලිවීමට ලබා දුන් කාර්යයේදී, Gemini විසින් සකසන ලද ලිපිය AI මඟින් ලියන ලද්දක් බව හඳුනාගැනීමේ හැකියාව (Detection rate) අවම මට්ටමක පැවතුණි. විශේෂයෙන්ම QuillBot වැනි මෘදුකාංග හරහා පරීක්ෂා කිරීමේදී එය AI මඟින් ලියන ලද්දක් බව කිසිසේත්ම හඳුනා ගැනීමට නොහැකි වී ඇත.
ChatGPT මෙම පරීක්ෂණයේදී සාපේක්ෂව දුර්වල මට්ටමක පසුවේ. එයට හේතුව ලෙස දක්වා ඇත්තේ ChatGPT වෙළෙඳපොළට පැමිණි මුල්ම ප්රධාන AI පද්ධතිය වීම නිසා එහි ඇති සුවිශේෂී ලිවීමේ රටාව (Distinctive style) හඳුනාගැනීමට හඳුනාගැනීමේ මෘදුකාංග මේ වන විට හුරු වී තිබීමයි.
AI ලිවීම් හඳුනාගැනීමට භාවිතා කරන මෘදුකාංග අතර ද විශාල වෙනස්කම් පවතී. Grammarly මෘදුකාංගය හඳුනාගෙන ඇත්තේ AI ලිවීම්වලින් 43.5%ක් පමණක් වන අතර, GPTZero මෘදුකාංගය 99%ක සාර්ථකත්වයක් පෙන්වා ඇත.
එකම ලිපිය එක් මෘදුකාංගයකින් ‘මිනිස් ලිවීමක්’ ලෙසත් තවත් මෘදුකාංගයකින් ‘AI ලිවීමක්’ ලෙසත් වර්ග කිරීම නිසා පාසල්, විශ්වවිද්යාල සහ සේවා ස්ථානවලදී ගැටලුකාරී තත්ත්වයන් මතු විය හැකි බව පර්යේෂකයෝ පෙන්වා දෙති.
Gemini පද්ධතිය හුරුපුරුදු වාක්ය රටාවලින් බැහැරව නව්ය ආකාරයට අදහස් ගොඩනැඟීම නිසා එය මිනිස් ලිවීමකට වඩාත් සමීප වී ඇති බව විචාරකයන්ගේ මතයයි. මේ වන විට අන්තර්ජාලයේ ඇති අන්තර්ගතයන්ගෙන් අඩක් පමණ AI මඟින් නිර්මාණය වූ ඒවා විය හැකි බව ද නවතම වාර්තා පවසයි.
