විශ්රාම වයස වෙනස් කිරීම සම්බන්ධයෙන් විවිධ පාර්ශ්වයන්ගෙන් ලැබී ඇති ඉල්ලීම් පිළිබඳව රජය මේ වන විට සලකා බලමින් සිටින බව සෞඛ්ය හා ජනමාධ්ය අමාත්ය වෛද්ය නලින්ද ජයතිස්ස මහතා පවසයි. අමාත්යවරයා මේ බව ප්රකාශ කළේ ඊයේ (12) මීරිගම රෝහලේ නව වකුගඩු ගල් ඉවත් කිරීමේ ප්රතිකාර ඒකකය විවෘත කිරීමේ අවස්ථාවට සහභාගී වීමෙන් අනතුරුව මාධ්ය වෙත අදහස් දක්වමිනි.
අමාත්යවරයා පැවසුවේ අභියාචනාධිකරණය, ශ්රේෂ්ඨාධිකරණය සහ මහාධිකරණය ඇතුළු අධිකරණ ක්ෂේත්රයෙන් මෙන්ම සෞඛ්ය සේවාව සහ බන්ධනාගාර දෙපාර්තමේන්තුව වැනි ක්ෂේත්රවල වෘත්තිකයින් ද විශ්රාම යන වයස වැඩි කිරීම සම්බන්ධයෙන් ඉල්ලීම් ඉදිරිපත් කර ඇති බවයි. තමන්ට තවදුරටත් සේවය කිරීමට හැකියාව පවතින බව එම වෘත්තිකයින්ගේ අදහස වී ඇත.
මෙම ඉල්ලීම් සම්බන්ධයෙන් සමාජයේ විවිධ මතවාද පැවතිය හැකි වුවද, රජයක් ලෙස එම ඉල්ලීම් සලකා බලා අවශ්ය පියවර ගැනීමට කටයුතු කරන බව අමාත්යවරයා වැඩිදුරටත් සඳහන් කළේය.
