සෞඛ්ය හා ජනමාධ්ය අමාත්ය වෛද්ය නලින්ද ජයතිස්ස මහතා පවසන්නේ වත්මන් රජයේ මුල් වසර පහ තුළ හෙද සේවාවට 13,600ක් බඳවා ගැනීමට කටයුතු කරන බවයි. එම ඉලක්කයෙන් 30%ක් දැනටමත් සම්පූර්ණ කර ඇති අතර, ලබන ඔක්තෝබර් මාසයේ ලබා දීමට නියමිත හෙද පත්වීම් 2,867 සමඟ එම ඉලක්කයෙන් 50%ක් සම්පූර්ණ වනු ඇත.
අමාත්යවරයා මෙම කරුණු අනාවරණය කළේ මෙරට නිදහස් සෞඛ්ය සේවාවේ මානව සම්පතේ ගුණාත්මකභාවය සහ කාර්යක්ෂමතාව ඉහළ නැංවීමේ අරමුණින් විද්යාවේදී හෙද (BSc Nursing) උපාධිධාරීන් 515 දෙනෙකුට පත්වීම් ප්රදානය කිරීමේ අවස්ථාවට එක්වෙමින්ය. මෙම පත්වීම් ලිපි ප්රදානය පසුගිය (29) දින කොළඹ 07 පදනම් ආයතන පරිශ්රයේදී සිදු කෙරිණි.
III ශ්රේණියේ හෙද නිලධාරීන් ලෙස බඳවා ගත් මෙම පිරිස රජයේ විශ්වවිද්යාල මඟින් විද්යාවේදී ගෞරව හෙද උපාධිය සම්පූර්ණ කර ඇති අතර, හෙද සේවා ව්යවස්ථාවට අනුව සය මාසික පුහුණු පාඨමාලාවක්ද හදාරා තිබේ. රටේ සෞඛ්ය සේවාවේ පවතින පුරප්පාඩු ක්රමානුකූලව සම්පූර්ණ කරමින් සිටින බවත්, පසුගිය වසරක කාලය තුළ පමණක් හෙද සේවාවට 3,956 දෙනෙකු බඳවාගෙන ඇති බවත් අමාත්යවරයා සඳහන් කළේය.
තවද, 2025 සහ 2026 වර්ෂවලදී අලුතින් හෙද සේවාවට 6,823ක් ඇතුළත් වන අතර, 2028 වර්ෂයේදී 1,949ක කණ්ඩායමක් සහ 2029 වර්ෂයේ මැද භාගයේදී 2,920ක කණ්ඩායමක් පත්වීම් ලබා ගැනීමට නියමිත බවද හෙතෙම පැවසීය. විද්යාවේදී හෙද උපාධිධාරීන් III ශ්රේණියේ තනතුරු සඳහා අවසන් වරට බඳවා ගැනීම් සිදුකර ඇත්තේ 2021 වර්ෂයේදී වන බැවින්, වසර පහකට පසු මෙම බඳවා ගැනීම සිදුවීම සුවිශේෂී කරුණක් බවද අමාත්යාංශය පෙන්වා දෙයි.
