විධායකය විසින් අධිකරණයට සිදුකරන බලපෑම් පිළිබඳව පාර්ලිමේන්තු විවාදයක් ලබාදෙන ලෙස විපක්ෂය කළ ඉල්ලීම ආණ්ඩු පක්ෂය විසින් ප්රතික්ෂේප කර තිබේ. විපක්ෂ නායක සජිත් ප්රේමදාස මහතා ඇතුළු මන්ත්රීවරුන් 36 දෙනෙකුගේ අත්සනින් යුතුව කථානායකවරයා වෙත මෙම ඉල්ලීම ඉදිරිපත් කර තිබුණද, එළැඹෙන පාර්ලිමේන්තු සතියේදී ඒ සඳහා අවස්ථාව ලබාදීමට රජය එකඟ වී නොමැති බව වාර්තා වේ.
මේ පිළිබඳව අදහස් දක්වමින් විපක්ෂයේ ප්රධාන සංවිධායක ගයන්ත කරුණාතිලක මහතා සඳහන් කළේ, රජයේ මෙම තීරණය ප්රජාතන්ත්රවාදයට එල්ල වූ බලවත් පහරක් බවයි. මීට අමතරව, මුදල් අමාත්යාංශයේ සිදුව ඇති බව කියන ආන්දෝලනාත්මක ගනුදෙනුවක් සම්බන්ධයෙන් විවාදයක් ලබාදීමට පසුගියදා ඉදිරිපත් වූ යෝජනාව ද ආණ්ඩු පක්ෂය විසින් ප්රතික්ෂේප කර ඇති බව ඔහු වැඩිදුරටත් අනාවරණය කළේය. රජයේ මෙම පිළිවෙත හරහා වැදගත් කරුණු පිළිබඳව පාර්ලිමේන්තුව තුළ සංවාදයක් ඇති කිරීම හිතාමතාම මඟහරින බවට විපක්ෂය චෝදනා කරයි.
