ආක්ටික් කලාපයට අයත් ග්‍රීන්ලන්ත (Greenland) දූපතේ පාලනය ඇමෙරිකානු එක්සත් ජනපදය වෙත ලබාගැනීම සඳහා ජනාධිපති ඩොනල්ඩ් ට්‍රම්ප් විසින් නැවත වරක් ඉදිරිපත් කරන ලද යෝජනාව එරට ජනතාව විසින් සෘජුවම ප්‍රතික්ෂේප කර තිබේ. නූක් (Nuuk) අගනුවර පැවැති සාම්ප්‍රදායික කයාකිං (Kayaking) ශූරතාවලියකට සහභාගී වෙමින් සිටි ග්‍රීන්ලන්ත වැසියන් අවධාරණය කළේ තම දූපතේ අනාගතය තීරණය කළ යුත්තේ බාහිර රටවල් නොව, තමන් විසින්ම පමණක් බවයි.
ග්‍රීන්ලන්තයේ පවතින උපායමාර්ගික වැදගත්කම සහ ස්වාභාවික සම්පත් හේතුවෙන් එය ඇමෙරිකාවේ පාලනයට නතු කරගැනීමට ට්‍රම්ප් මීට පෙරද උත්සාහ කළ අතර, නේටෝ සමුළුව අතරතුර ඔහු එම අදහස නැවත වරක් කරළියට ගෙනවිත් ඇත. කෙසේ වෙතත්, ඩෙන්මාර්කයට අයත් ස්වයං පාලන කලාපයක් වන ග්‍රීන්ලන්තයේ වැසියන් සහ එරට දේශපාලන නායකයන් ප්‍රකාශ කරන්නේ තමන් කිසිසේත්ම ඇමෙරිකාවේ කොටසක් වීමට සූදානම් නැති බවයි.
ගෝලීය දේශපාලනයේ දැඩි අවධානයක් දිනා ඇති මෙම සිදුවීමත් සමඟ, ග්‍රීන්ලන්තයේ ස්වෛරීභාවය සුරැකීම වෙනුවෙන් එරට වැසියන් දැඩි ස්ථාවරයක පසුවන බව විදෙස් මාධ්‍ය වාර්තා කරයි.
තොරතුරු උපුටා ගැනීම: Reuters ඇසුරින්
