බටහිර අප්රිකානු රටක් වන ගිනියාව සමඟ සංචාරක හා පුළුල් ආර්ථික සහයෝගතා නංවාලීම සඳහා තමන් ඉදිරිපත් කළ යෝජනාවට විදේශ අමාත්යාංශය ලබා දුන් ප්රතිචාරය දැඩි ලෙස විවේචනය කරමින් ශ්රී ලංකාවේ ගිනියානු ගෞරවනීය කොන්සල් වෛද්ය අනුරුද්ධ ශානක මහතා ලිපියක් යොමු කර තිබේ. සෘජු ගුවන් ගමන් සේවා නොමැතිකම සහ සංචාරක පැමිණීම් නොමැති වීම පදනම් කරගනිමින් අමාත්යාංශය දැක්වූ අදහස් “මූලික වශයෙන් වැරදි සහගත” බවත්, එය උපායමාර්ගික වැඩපිළිවෙළක වටිනාකමට අදාළ නොවන බවත් ඔහු පෙන්වා දී ඇත.
විදේශ අමාත්යාංශයේ අප්රිකානු කටයුතු පිළිබඳ අධ්යක්ෂ ජෙනරාල්වරයා වෙත දැඩි වචනවලින් යුතුව යොමු කර ඇති මෙම ලිපිය මඟින් ඔහු අවධාරණය කර ඇත්තේ ගමනාගමන පහසුකම් නොමැතිකම යනු නැගී එන අප්රිකානු වෙළඳපොළක් අත්හැර දැමීමට හේතුවක් කර නොගෙන, විසඳාගත යුතු අභියෝගයක් ලෙස සැළකිය යුතු බවයි. 2025-2026 කාලය තුළ ගිනියාවෙන් ඉහළ වටිනාකමකින් යුත් අමුත්තන් 11 දෙනෙකු පමණ පැමිණ ඇති බවත්, මෑතකදී ඔහු සමඟ පැමිණි ඉහළ ශුද්ධ වටිනාකමක් ඇති දූත පිරිසක් කොළඹ ප්රමුඛ පෙළේ හෝටලයක සතියක් ගත කරමින් ඇමරිකානු ඩොලර් 40,000ත් 50,000ත් අතර මුදලක් වියදම් කර ඇති බවත් ඔහු මෙහිදී සංඛ්යාලේඛන පෙන්වා දෙමින් සඳහන් කර තිබේ.
අතීතයේ සංචාරක පැමිණීම් නොවීම යනු කිසිදු අවස්ථාවක් නොමැති වීම නොපෙන්වන බවත්, ඉන් ඇඟවෙන්නේ ශ්රී ලංකාව තවමත් එම වෙළඳපොළ නිසි ලෙස සංවර්ධනය කර නොමැති බව පමණක් බවත් කොන්සල්වරයා පෙන්වා දී ඇත. බහු බිලියන ඩොලර් වටිනා සිමන්ඩූ (Simandou) ව්යාපෘතිය ඇතුළුව ගිනියාවේ වේගයෙන් ව්යාප්ත වන පතල් හා යටිතල පහසුකම් ආර්ථිකයේ ප්රතිලාභ වෙනත් තරඟකරුවන් ලබා ගැනීමට පෙර ශ්රී ලංකාව වහාම ක්රියාත්මක විය යුතු බවද ඔහු අවධාරණය කර තිබේ.
මීට අමතරව, රාජ්ය තාන්ත්රික ප්රොටෝකෝලය උල්ලංඝනය කරමින් කටයුතු කිරීම සම්බන්ධයෙන්ද ඔහු අමාත්යාංශයට දැඩි දෝෂදර්ශනයක් එල්ල කර ඇත. ගිනියාව සඳහා අක්තපත්ර ලබා දී ඇති සහ තමා වාර්තා කළ යුතු නයිරෝබි හි පිහිටි මහකොමසාරිස් කාර්යාලය හරහා පමණක් තමාගේ රාජකාරී කටයුතු සම්බන්ධයෙන් සන්නිවේදනය කළ යුතු බවට ඔහු දැඩිව කියා සිටියේය. ආයතනික විනය සහ රාජ්ය තාන්ත්රික ධුරාවලිය ආරක්ෂා කර ගැනීම සඳහා නිසි ක්රියාමාර්ග අනුගමනය කිරීම අත්යවශ්ය වන බවද වෛද්ය අනුරුද්ධ ශානක මහතා වැඩිදුරටත් පෙන්වා දී තිබේ.
