ශ්රී ලංකා ක්රිකට් ජාතික තේරීම් කමිටුව සඳහා මෑතකදී සිදුකරන ලද නව පත්වීම් සම්පූර්ණයෙන්ම නීතිවිරෝධී බවත්, එමඟින් මෙරට ක්රිකට් පරිපාලනය තවදුරටත් දේශපාලනීකරණය වීමේ බරපතල අවදානමක් මතුව ඇති බවත් හිටපු ක්රීඩා අමාත්ය හරින් ප්රනාන්දු මහතා පවසයි. ඔහු පෙන්වා දෙන්නේ මෑතකදී පත් කරන ලද ‘ක්රිකට් පරිවර්තන කමිටුව’ (Cricket Transformation Committee) විසින් පුළුල් ව්යුහාත්මක හෝ පාලන ප්රතිසංස්කරණ සිදුකිරීම වෙනුවට, ඔවුන්ගේ පළමු පියවර ලෙස ක්රිකට් තේරීම් කමිටු සාමාජිකයන් වෙනස් කිරීමට කටයුතු කර ඇති බවයි.
මෙම පත්වීම් සිදුකිරීමේදී නිසි ක්රියාපටිපාටිය අනුගමනය කර නොමැති බවත්, ඒ සඳහා කිසිදු නාම යෝජනා කැඳවීමක් සිදුකර නොමැති බවත් හෙතෙම චෝදනා කරයි. වත්මන් ක්රිකට් ක්රීඩාවේ පවතින සමාජ මාධ්ය පීඩනය, වාණිජමය වටපිටාව සහ වර්තමාන පළමු පෙළ ක්රිකට් මට්ටම පිළිබඳව මැනවින් වටහාගත හැකි නූතන ක්රිකට් ක්රීඩාව ගැන අවබෝධයක් ඇති තරුණ පිරිස් තේරීම් කමිටුවට පත්කිරීමේ අවශ්යතාව ඔහු අවධාරණය කළේය.
“අසල්වැසි ඉන්දියාව වැනි රටවල් පවා තමන්ගේ තේරීම් කමිටු සඳහා මෑතකාලීනව ක්රීඩා කළ තරුණ හිටපු ක්රීඩකයන් පත් කරද්දී, ලංකාවෙන් දැන් පත් කරලා තියෙන්නේ 1980 දශකයේ ක්රීඩා කරපු අය” යැයි හරින් ප්රනාන්දු මහතා පැවසීය. තමන් ක්රීඩා අමාත්යවරයාව සිටි සමයේදී උපුල් තරංග වැනි තරුණ ක්රීඩකයෙකු තේරීම් කමිටු සභාපතිත්වයට පත් කළේ එවැනි නූතන ක්රිකට් දැක්මක් ක්රිකට් ක්ෂේත්රයට දායාද කිරීමට බවත්, වත්මන් ක්රියාවලිය සැබෑ පරිවර්තනයක් වෙනුවට දේශපාලන ව්යාපෘතියක් බවට පත්වෙමින් ඇති බවත් ඔහු වැඩිදුරටත් සඳහන් කළේය.
(තරුණ කටයුතු හා ක්රීඩා අමාත්ය සුනිල් කුමාර ගමගේ මහතාගේ අනුමැතිය ඇතිව පසුගියදා පත් කෙරුණු නව තේරීම් කමිටුවේ සභාපතිවරයා ලෙස හිටපු වේගපන්දු යවන ක්රීඩක කපිල විජේගුණවර්ධන මහතා පත් කර ඇති අතර, අමල් සිල්වා, බ්රෙන්ඩන් කුරුප්පු, වරුණ වරගොඩ සහ වැනීසා ද සිල්වා එහි සෙසු සාමාජිකයෝ වෙති.)
