එකඟ නොවීම් කළමනාකරණය කර ගනිමින්, එකිනෙකාගේ මතවලට ගරු කිරීමට ඉගෙන ගැනීම අද ලෝකය තුළ ප්‍රවර්ධනය කළ යුතු ඉතා වැදගත් ගුණාංගයක් බව අධ්‍යාපන, උසස් අධ්‍යාපන සහ වෘත්තීය අධ්‍යාපන අමාත්‍ය අග්‍රාමාත්‍ය ආචාර්ය හරිනි අමරසූරිය මහත්මිය ප්‍රකාශ කළාය. කොළඹ ක්‍රමය (Colombo Plan) සංවිධානයේ 75 වැනි සංවත්සරයට සමගාමීව විශ්වවිද්‍යාල ප්‍රතිපාදන කොමිෂන් සභා පරිශ්‍රයේදී පැවැත්වුණු අන්තර් විශ්වවිද්‍යාල විවාද තරගාවලියට ප්‍රධාන ආරාධිතයා ලෙස එක්වෙමින් අග්‍රාමාත්‍යවරිය මේ බව පවසා සිටියාය.
කොළඹ ක්‍රමය යනු රටවල් අතර දැනුම හා සම්පත් බෙදාහදා ගනිමින් ජන ජීවිත නංවාලීම සඳහා ආරම්භ කරන ලද වැඩසටහනක් බවත්, එය ලෝකයට ලබාදෙන්නේ අන්‍යෝන්‍ය සහයෝගීතාවයේ පණිවිඩයක් බවත් ඇය පැවසුවාය. විවාද සඳහා යොදාගත් සමුද්‍රීය උපදේශන, මත්ද්‍රව්‍ය නිවාරණය සහ නායකත්වය වැනි මාතෘකා සමාජයේ පවතින සැබෑ ප්‍රශ්න බවත්, ඒවාට විසඳුම් සෙවීම වර්තමාන තරුණ පරපුරේ වගකීමක් බවත් අග්‍රාමාත්‍යවරිය පෙන්වා දුන්නාය. අදහස් හුවමාරු කරගැනීම, වාද විවාද කිරීම සහ තමා අකමැති මතයක් වුවද ඉවසීමෙන් යුතුව අසා සිටීමට හුරුවීම වැනි ගුණාංග ලෝකයට ඉතා වැදගත් බව ඇය අවධාරණය කළාය.
විශ්වවිද්‍යාල සිසුන් යනු රටේ ජනතාවගේ ආයෝජනයකින් ඉගෙන ගන්නා පිරිසක් බැවින්, ඔවුන් තමන්ගේ සාර්ථකත්වය පමණක් නොව සමාජයේ යහපත උදෙසා කැපවෙන පුරවැසියන් විය යුතු බව අග්‍රාමාත්‍යවරිය සිහිපත් කළාය. විශ්වවිද්‍යාල ප්‍රතිපාදන කොමිෂන් සභාවේ සහය ඇතිව කොළඹ ක්‍රමය සංවිධානයේ මහලේකම් කාර්යාලය විසින් සංවිධානය කරන ලද මෙම විවාද තරගාවලිය සඳහා කොළඹ, කැලණිය, ශ්‍රී ජයවර්ධනපුර සහ ජෙනරාල් ශ්‍රීමත් ජෝන් කොතලාවල ආරක්ෂක විශ්වවිද්‍යාලය නියෝජනය කරමින් සිසුහු සහභාගී වූහ.
මෙම අවස්ථාවට විදෙස් තානාපති කාර්යාල නියෝජිතයින්, විශ්වවිද්‍යාල ප්‍රතිපාදන කොමිෂන් සභාවේ උසස් නිලධාරීන් සහ කොළඹ ක්‍රමය සංවිධානයේ මහලේකම් ආචාර්ය බෙන්ජමින් පී. රෙයෙස් මහතා ඇතුළු පිරිසක් එක්ව සිටියහ.
