කිසිදු පුරවැසියෙකු මඟ නොහැර සියලු දෙනාට සම අයිතිවාසිකම් සහ සම අවස්ථා තහවුරු කිරීම රජයේ මූලිකම ප්රතිපත්තිය බව අග්රාමාත්ය ආචාර්ය හරිනි අමරසූරිය පැවසුවාය. ජනාධිපති අරමුදල මඟින් සංවිධානය කළ ‘සරසවි දිරියෝ අභිමන්’ – ආබාධ සහිත විශ්වවිද්යාල ශිෂ්ය ශිෂ්යාවන් ඇගයීමේ උත්සවය යාපනය දිස්ත්රික් ලේකම් කාර්යාලයීය ශ්රවණාගාරයේදී පැවැත්වුණු අතර, එහිදී උතුරු පළාතේ විශ්වවිද්යාලවල අධ්යාපනය ලබන ආබාධ සහිත සිසුන් 75 දෙනෙකු වෙත ඇගයීම් සහතික සහ ලක්ෂය බැගින් වූ මූල්ය ප්රදානයන් අග්රාමාත්යතුමිය විසින් සිදු කරන ලදී.
දිවයිනේ බහුතරයක් ආබාධ සහිත පිරිසක් වාර්තා වන්නේ අමිහිරි යුද්ධයේ අත්දැකීම් සහිත උතුර සහ නැගෙනහිරින් බවත්, යළි යුද්ධයක් ඇති නොවන සහ එහි සාධක නැති කරන රජයක් ලෙස මෙම වැඩසටහන එම පළාතේ ක්රියාත්මක කිරීමට ලැබීම ගැන සතුටු වන බවත් අගමැතිතුමිය මෙහිදී ප්රකාශ කළාය. ජනාධිපති අරමුදල වරප්රසාද ලත් අයට පමණක් හිමි වූ තත්ත්වයට තිත තබා එය ජනතාව ළඟට ගෙන ඒම රජයේ විශාල ජයග්රහණයක් බවද ඇය සඳහන් කළාය. අඩු ආදායම්ලාභී පවුල්වල ආබාධිත සිසුන් වෙනුවෙන් මාසික දීමනාවක් ලබා දීම මෙන්ම තාක්ෂණික සහය ලබා දීමේ නියමු ව්යාපෘතියක් දැනටමත් රජය ආරම්භ කර ඇති බවද ඇය වැඩිදුරටත් පැවසුවාය.
මෙම අවස්ථාවට කථානායක ජගත් වික්රමරත්න, උතුරු පළාත් ආණ්ඩුකාර නාගලිංගම් වේදනායගන්, ධීවර අමාත්ය රාමලිංගම් චන්ද්රසේකර්, පාර්ලිමේන්තු මන්ත්රී සුගත් වසන්ත ද සිල්වා ඇතුළු මහත්ම මහත්මීන්, රාජ්ය නිලධාරීන් සහ සිසුන්ගේ දෙමාපියන් විශාල පිරිසක් සහභාගී වූහ.
