ජාතික ජන බලවේගය බලයට පත්වීමට පෙර එල්ල වූ විවිධ අභූත චෝදනා නිසා පසුගිය මැතිවරණයේදී ඡන්දය නොදුන් ජනතාව, විශේෂයෙන්ම කොළඹ මැද පන්තියේ සිවිල් වැසියන් පවා මේ වන විට වත්මන් රජයේ නිවැරදි ගමන්මග කෙරෙහි පැහැදීමට පත්ව ඇති බව අධිකරණ සහ ජාතික ඒකාබද්ධතා අමාත්ය හර්ෂණ නානායක්කාර මහතා පවසයි. මේ හේතුවෙන් රජය කෙරෙහි පවතින මහජන මතය පෙරට වඩා බෙහෙවින් ප්රබල වී ඇති බව ද අමාත්යවරයා සඳහන් කළේය.මෑතකදී පැවැති සමුපකාර සමිති මැතිවරණවලදී ජාතික ජන බලවේගයට ඇතැම් බලයන් ගිලිහී යාම සම්බන්ධයෙන් අදහස් දැක්වූ අමාත්යවරයා කියා සිටියේ, එය කිසිසේත්ම ආණ්ඩුව කෙරෙහි පවතින සමස්ත ජනමතයේ පසුබෑමක් ලෙස තමන් නොදකින බවයි. සමූපකාර ඡන්ද පවත්වනු ලබන්නේ එහි ලියාපදිංචි සාමාජිකයන් අතර පමණක් බව ඔහු පෙන්වා දුන්නේය.එමෙන්ම, වත්මන් සමාජය තුළ ජනතාව රජයට යම් යම් කරුණු සම්බන්ධයෙන් දොස් නැඟීම හෝ බැනීම සිදුකරනු ලබන්නේ රජය කෙරෙහි පවතින දැඩි ආදරය, අපේක්ෂාව සහ විශ්වාසය නිසාවෙන් බවත්, එයින් තහවුරු වන්නේ ආණ්ඩුව කෙරෙහි ජනතාව තුළ තවමත් පවතින දැඩි විශ්වාසනීයත්වය බවත් ඇමැතිවරයා වැඩිදුරටත් අවධාරණය කර සිටියේය.
