ජාතික ජන බලවේගය ආණ්ඩුව බලයට පත්වීමට පෙර ජනතාවට අහස උසට සිහින මාලිගා මවා පෙන්වූව ද දැන් ඒවා එකින් එක බිඳ වැටෙමින් පවතින බව සමගි ජන බලවේගයේ කොළඹ දිස්ත්රික් පාර්ලිමේන්තු මන්ත්රී මුජිබර් රහුමාන් මහතා පවසයි. විශේෂ මාධ්ය හමුවක් පවත්වමින් අදහස් දැක්වූ මන්ත්රීවරයා අවධාරණය කළේ වත්මන් ආණ්ඩුවට කිසිදු ආර්ථික කළමනාකරණයක් නොමැති බවයි.වත්මන් ආර්ථික තත්ත්වය සහ වෙළෙඳපොළ මිල ගණන් පිළිබඳව දැඩි ලෙස විවේචනය කළ මන්ත්රීවරයා, ආණ්ඩුවට මේ වන විට ඇමෙරිකානු ඩොලරය පාලනය කරගැනීමට නොහැකි වී ඇති අතර එය දිනෙන් දින ඉහළ යමින් පවතින බව පෙන්වා දුන්නේය. “මැතිවරණ කාලයේදී ලක්ෂ දොළහට (1,200,000) විට්ස් (Vitz) මෝටර් රථ ලබාදෙන බවටයි ඔවුන් කතා කළේ. නමුත් අද වන විට වාහන මිල සියයට පනහකින් (50%) ඉහළ දමා තිබෙනවා. අද සාමාන්ය මිනිසෙකුට මෝටර් රථයක්, යතුරුපැදියක් තබා පුෂ් බයිසිකලයක්වත් මිලදී ගැනීමට නොහැකි තත්ත්වයක් උදාවෙලා” යැයි ඔහු පැවසීය.රාජ්ය ආයතනවල සිදුවන මූල්ය අක්රමිකතා පිළිබඳව ද මෙහිදී මන්ත්රීවරයා කරුණු අනාවරණය කළේය. මහජන බැංකුව තුළ වැරදි සහගත මුදල් ගෙවීමක් සිදුව ඇති බවත්, ශ්රී ලංකන් ගුවන් සමාගම (SriLankan Airlines) තුළ ද අක්රමවත් ලෙස වැඩිපුර මුදල් ගෙවීමක් සිදුව ඇති බවත් ඔහු හෙළි කළේය. මෙරට ඉතිහාසයේ මීට පෙර කිසිදු දිනක සිදුනොවූ මෙවැනි බරපතළ මූල්ය අවභාවිතාවන් වත්මන් පාලනය යටතේ සිදුවන්නේ මන්දැයි ඔහු ප්රශ්න කර සිටියේය. මෙවැනි අර්බුදකාරී තත්ත්වයන් මඟහරවා ගැනීම සඳහා ආණ්ඩුවේ අදාළ සමාගම් සහ ආයතන වෙනුවෙන් වහාම සුදුසු නව කළමනාකාරිත්වයක් පත්කළ යුතු බව ද ඔහු යෝජනා කළේය.මීට අමතරව, ආණ්ඩුවේ පාර්ශවකරුවන් පිරිසක් විසින් බලහත්කාරයෙන් රජයේ ගොඩනැගිලි සහ දේපොළ අත්පත් කරගැනීමේ සිදුවීමක් පිළිබඳව ද මුජිබර් රහුමාන් මහතා සිය දැඩි අප්රසාදය පළ කළේය. “2015 වසරේදී යහපාලන ආණ්ඩුව මඟින් නීත්යානුකූලව රජයට පවරා ගන්නා ලද, රජය සතු දේපොළක් මේ වන විට ආණ්ඩුවේ පාර්ශවයක් විසින් බලහත්කාරයෙන් අල්ලාගෙන තිබෙනවා. රජයේ පොදු දේපොළ මෙලෙස අවනීතික ලෙස අත්පත් කරගැනීම ඉතාමත් නරක සහ භයානක පූර්වාදර්ශයක්” යැයි පවසමින් මන්ත්රීවරයා ආණ්ඩුවේ ක්රියාකලාපය දැඩි දෝෂදර්ශනයට ලක් කළේය.
