කොළඹ ප්රදේශයේ රැකියාවක නිරතව සිටින තම ආදරණීය දෙමව්පියන් බැලීම සඳහා තනිවම බස් රථයකින් කොළඹ බලා යාමට හැටන් බස් නැවතුම්පොළට පැමිණි වයස අවුරුදු 7ක කුඩා පාසල් සිසුවෙකු, එහි සිටි නිලධාරීන්ගේ මැදිහත්වීමෙන් අද (27) දින හැටන් පොලිස් භාරයට ගෙන තිබේ.
මෙලෙස පොලිස් භාරයට පත්ව ඇත්තේ හැටන් ප්රදේශයේ ප්රමුඛ පෙළේ දමිළ විද්යාලයක පළමු වසරේ අධ්යාපනය ලබන කුඩා පිරිමි දරුවෙකි.
අද දහවල් කාලයේදී මෙම කුඩා දරුවා කිසිදු වැඩිහිටියෙකු නොමැතිව තනිවම හැටන් බස් නැවතුම්පොළේ රැඳී සිටිනු දුටු ලංගම (SLTB) වේලා සටහන්කරු (Time Keeper) වහා ක්රියාත්මක වී දරුවාගෙන් තොරතුරු විමසා ඇත. එහිදී දරුවා පවසා ඇත්තේ තම මව සහ පියා කොළඹ ප්රදේශයේ රැකියාවක නිරත වන බවත්, ඔවුන්ව බැලීමට කොළඹ යාම සඳහා තමන් පැමිණි බවත්ය. මෙම ගමන සඳහා තමන්ට ලොකු අම්මා විසින් මුදල් ලබාදුන් බව ද දරුවා පවසා තිබේ.
වයස අවුරුදු 7ක කුඩා දරුවෙකු මෙලෙස බරපතළ අවදානමක් ගනිමින් තනිවම කොළඹ යාමට සැරසීම පිළිබඳව දැඩි ලෙස සැක සිතූ වේලා සටහන්කරු, වහාම දරුවාට බස් රථයට නැගීමට ඉඩ නොදී තමා භාරයේ තබාගෙන හැටන් පොලිස් ස්ථානය වෙත හදිසි දැනුම්දීමක් කර ඇත. ඒ අනුව වහාම බස් නැවතුම්පොළ වෙත පැමිණි හැටන් පොලිසියේ නිලධාරීන් කණ්ඩායමක් වෙත වේලා සටහන්කරු විසින් දරුවාව නිරුපද්රිතව භාර දෙන ලදී.
මේ සම්බන්ධයෙන් අප හැටන් පොලිසියේ උසස් නිලධාරියෙකුගෙන් කළ විමසීමකදී ඔහු කියා සිටියේ, දරුවා දැනට පොලිස් කාන්තා හා ළමා කාර්යාංශයේ රැකවරණය මැද පසුවන බවයි. දරුවාගේ හැටන් ප්රදේශයේ පදිංචි ඥාතීන් සහ කොළඹ සිටින දෙමව්පියන් වහාම පොලිසිය වෙත කැඳවීමට පියවර ගනිමින් සිටින බවත්, ඉන් අනතුරුව හැටන් මහේස්ත්රාත් අධිකරණය වෙත කරුණු වාර්තා කර, අධිකරණ නියෝග මත දරුවාව නිසි පරිදි දෙමව්පියන් වෙත ආරක්ෂිතව භාරදීමට කටයුතු කරන බවත් එම උසස් පොලිස් නිලධාරියා වැඩිදුරටත් සඳහන් කළේය.
