රට තුළ පවතින සංකීර්ණ ආර්ථික අභියෝග සහ ගෝලීය දේශපාලනික අවිනිශ්චිතතා මධ්යයේ වුවද, හැටන් නැෂනල් බැංකුව (HNB) සිය සමස්ත වත්කම් ප්රමාණය රුපියල් ට්රිලියන 2.5ක දැවැන්ත සීමාවෙන් ඔබ්බට රැගෙන යමින් 2026 වසරේ පළමු කාර්තුව තුළ අතිශය ශක්තිමත් මූල්ය ප්රගතියක් අත්කර ගැනීමට සමත්ව ඇත. විචක්ෂණශීලී ශේෂ පත්ර කළමනාකරණය සහ වත්කම්වල උසස් ගුණාත්මකභාවය හේතුවෙන් බැංකුව මෙලෙස පළමු කාර්තුව තුළ පමණක් රුපියල් බිලියන 9.95ක බදු පසු ලාභයක් (PAT) වාර්තා කර තිබේ. මේ අතර සමස්ත HNB සමූහයේ (HNB Group) බදු පසු ලාභය ද රුපියල් බිලියන 10.35ක් ලෙස ස්ථාවර මට්ටමක සටහන්ව ඇත.
මෙම කාලසීමාව තුළ බැංකුවේ ශුද්ධ පොලී ආදායම (NII) පසුගිය වසරට සාපේක්ෂව 13.5%ක වර්ධනයක් පෙන්වමින් රුපියල් බිලියන 26.9ක් දක්වා ඉහළ ගොස් ඇති අතර, ශුද්ධ පොලී ආන්තිකය (NIM) ද 4.26% සිට 4.45% දක්වා කැපී පෙනෙන ලෙස වර්ධනය වී තිබේ. පාරිභෝගික තැන්පතු ඉහළ යාම සහ ස්ථාවර අරමුදල් මූලාශ්ර ශක්තිමත් වීම හේතුවෙන් ණය ලබාදීම් සාර්ථකව පුළුල් කිරීමට බැංකුවට හැකි විය. මීට අමතරව, ලීසිං ක්ෂේත්රයේ ප්රගතිය, ඩිජිටල් සේවා පද්ධති වෙත පාරිභෝගිකයින් ආකර්ෂණය වීම සහ ක්රෙඩිට්/ඩෙබිට් කාඩ්පත් භාවිතය ඉහළ යාම හේතුවෙන් ශුද්ධ ගාස්තු සහ කොමිස් ආදායම 40.9%ක දැවැන්ත වර්ධනයක් සමඟින් රුපියල් බිලියන 6.8ක් ලෙස සටහන් විය. වෙළඳ කටයුතු පුළුල් වීම මත විදේශ විනිමය ආදායම ද රුපියල් බිලියන 1.6ක් දක්වා වර්ධනය වී ඇත.
බැංකුවේ සමස්ත මෙහෙයුම් ආදායම 17.2%ක වර්ධනයක් සමඟ රුපියල් බිලියන 36.1ක් දක්වා ඉහළ ගොස් ඇති අතර, ඉහළ පාරිභෝගික ක්රියාකාරකම් සහ කෘෂිකාර්මික ඇතුළු ප්රමුඛතා ක්ෂේත්ර සඳහා වන රජයේ ගාස්තු ඉහළ යාම හේතුවෙන් මෙහෙයුම් වියදම් ද 19.6%කින් ඉහළ ගොස් තිබේ. මෙම විශිෂ්ට මූල්ය කාර්යසාධනය පිළිබඳව අදහස් දක්වමින් HNB කළමනාකාර අධ්යක්ෂ සහ ප්රධාන විධායක නිලධාරී දමිත් පල්ලෙවත්ත මහතා ප්රකාශ කළේ, පවතින දැඩි අවිනිශ්චිත ව්යාපාරික වටපිටාව හමුවේ ක්ෂුද්ර මූල්ය, සුළු හා මධ්ය පරිමාණ මෙන්ම මහා පරිමාණ ඇතුළු සෑම ක්ෂේත්රයකම පාරිභෝගිකයින් සමඟ සමීපව කටයුතු කරමින් ඔවුන් ශක්තිමත් කිරීමට බැංකුව අඛණ්ඩව කැපවන බවයි.
