පවතින වර්ෂාපතනයත් සමඟ එළවළු වර්ග කිහිපයක තොග මිල ඉහළ ගොස් ඇති අතර, බිත්තර සහ කුකුළු මස් මිලදී ගැනීම සියයට 20කින් පමණ අඩුවී ඇති බව වෙළෙඳ ක්ෂේත්‍රයේ නියෝජිතයෝ පවසති.
මැනිං වෙළෙඳපොළ පොදු වෙළෙඳ සමිතියේ හිටපු සංවිධායක අනිල් ඉන්ද්‍රජිත් මහතාට අනුව, පසුගිය සතියේ රුපියල් 350–400 අතර පැවති තක්කාලි කිලෝවක තොග මිල මේ වන විට රුපියල් 600–650 දක්වා ඉහළ ගොස් තිබේ. මාළු මිරිස් කිලෝවක මිල රුපියල් 400–450 දක්වාත්, ගෝවා කිලෝවක තොග මිල රුපියල් 350 දක්වාත් ඉහළ ගොස් ඇති බව ඔහු සඳහන් කළේය.
බෝංචි, අමුමිරිස් සහ පතෝල ඇතුළු තවත් එළවළු වර්ග කිහිපයක මිලද ඉහළ මට්ටමක පවතින බව ඔහු පෙන්වා දුන්නේය. ඉදිරි උත්සව සමයත් සමඟ එළවළු මිල තවදුරටත් ඉහළ යා හැකි බවටද ඔහු අනාවැකි පළ කළේය.
මේ අතර, සමස්ත ලංකා කුකුළු ව්‍යාපාරිකයන්ගේ සංගමයේ සභාපති අජිත් ගුණසේකර මහතා පවසන්නේ පාරිභෝගිකයන්ගේ මිලදී ගැනීමේ ශක්තිය අඩුවීම හේතුවෙන් බිත්තර සහ කුකුළු මස් සඳහා ඇති ඉල්ලුම සියයට 20කින් පමණ පහළ ගොස් ඇති බවයි.
බිත්තරයක නිෂ්පාදන වියදම රුපියල් 30–32 අතර පවතින අතර, ගොවිපොළවලින්ද එම මිල පරාසයේ බිත්තර නිකුත් කරන බැවින් නිෂ්පාදකයන්ට ප්‍රමාණවත් ලාභයක් නොලැබෙන බව ඔහු සඳහන් කළේය.
කෙසේ වෙතත්, උත්සව සමයේදී වෙළෙඳපොළට අවශ්‍ය බිත්තර සහ කුකුළු මස් හිඟයකින් තොරව සැපයීමට කටයුතු කරන බවද සංගමය පවසයි.
