පසුගියදා සිදුකළ සන්නාම ප්රතිසංස්කරණයෙන් (Rebranding) අනතුරුව HNB Life PLC සමාගම 2026 වසරේ පළමු කාර්තුව සඳහා ඉතා ප්රබල මූල්ය ප්රතිඵල වාර්තා කර තිබේ. 2026 මාර්තු 31 දිනෙන් අවසන් වූ මාස තුනක කාලය තුළ සමාගම රුපියල් බිලියන 7.01ක දළ ලිඛිත රක්ෂණ වාරික (GWP) ආදායමක් උපයා ඇති අතර, එය 2025 වසරේ අදාළ කාල සීමාවේ වාර්තා වූ රුපියල් බිලියන 4.55ට සාපේක්ෂව 54%ක කැපී පෙනෙන වර්ධනයකි. එමෙන්ම ශුද්ධ ලිඛිත වාරික ආදායම ද 54%කින් ඉහළ ගොස් රුපියල් බිලියන 6.69ක් ලෙස සටහන් වී ඇත.
සමාගමේ සමස්ත ශුද්ධ ආදායම 39%කින් වර්ධනය වී රුපියල් බිලියන 8.69ක් දක්වා ඉහළ ගොස් ඇති අතර, මීට ආයෝජන මගින් ලැබුණු රුපියල් බිලියන 2.05ක පොලී සහ ලාභාංශ ආදායම ශක්තිමත් දායකත්වයක් ලබා දී තිබේ. 2026 මාර්තු අවසන් වන විට සමාගමේ සමස්ත වත්කම් ප්රමාණය රුපියල් බිලියන 71.38ක් දක්වා වර්ධනය වී ඇති අතර ජීවිත රක්ෂණ අරමුදල (Life Insurance Fund) රුපියල් බිලියන 52.55ක් දක්වා පුළුල් වී ඇත. අඩු පොලී අනුපාත පවතින පරිසරය සහ කොටස් වෙළෙඳපොළ උච්චාවචනයන් හමුවේ වුවද, සමාගම රුපියල් බිලියන 0.21ක බදු පසු ලාභයක් වාර්තා කිරීමට සමත් වී තිබේ.
සමාගමේ සභාපති ස්ටුවර්ට් චැප්මන් මහතා සඳහන් කළේ හැටන් නැෂනල් බැංකු සමූහයේ ස්ථාවරත්වය සහ උරුමය සමඟින් මෙම වර්ධනය අත්පත් කරගත් බවයි. විධායක අධ්යක්ෂ සහ ප්රධාන විධායක නිලධාරී ලසිත විමලරත්න මහතා ප්රකාශ කළේ පසුගිය වසර හතර පුරා ක්රියාත්මක කළ විධිමත් උපාය මාර්ග, ඩිජිටල්කරණය සහ බෙදාහැරීමේ ජාලය ශක්තිමත් කිරීම මෙම සාර්ථකත්වයට මූලික වූ බවයි.
